ITR ಫೈಲ್ ಮಾಡಿಲ್ಲವೇ? ಹೀಗೆ ಮಾಡಿ ಕೇವಲ 10 ನಿಮಿಷದಲ್ಲಿ ಪ್ರಕ್ರಿಯೆ ಪೂರ್ಣಗೊಳಿಸಿ

ಮೌಲ್ಯಮಾಪನ ವರ್ಷ 2026-27ಕ್ಕೆ ಸಂಬಂಧಿಸಿದ ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸಲು ಜುಲೈ 31 ಅಂತಿಮ ದಿನವಾಗಿದ್ದು, ತೆರಿಗೆದಾರರಿಗೆ ಇದೀಗ ಕೇವಲ ಎರಡು ದಿನಗಳಷ್ಟೇ ಸಮಯ ಉಳಿದಿದೆ. ಯಾವುದೇ ವಿಳಂಬ ಶುಲ್ಕವಿಲ್ಲದೆ ರಿಟರ್ನ್ಸ್ ಸಲ್ಲಿಸಲು ಇದೇ ಕೊನೆಯ ಅವಕಾಶವಾಗಿದ್ದು, ಈ ಬಾರಿ ಗಡುವು ವಿಸ್ತರಣೆಯಾಗುವ ಸಾಧ್ಯತೆ ತೀರಾ ಕಡಿಮೆ ಎಂದು ತೆರಿಗೆ ಇಲಾಖೆ ಸೂಚಿಸಿದೆ.

ಕೊನೆಯ ಕ್ಷಣದಲ್ಲಿ ಅರ್ಜಿ ಸಲ್ಲಿಸಲು ಮುಂದಾದರೆ ತಾಂತ್ರಿಕ ಸಮಸ್ಯೆಗಳು ಅಥವಾ ಮಾಹಿತಿಯಲ್ಲಿನ ತಪ್ಪುಗಳಿಂದ ಅನಗತ್ಯ ತೊಂದರೆ ಎದುರಾಗುವ ಸಾಧ್ಯತೆ ಇದೆ. ಆದ್ದರಿಂದ ಅರ್ಹ ತೆರಿಗೆದಾರರು ತಕ್ಷಣವೇ ರಿಟರ್ನ್ಸ್ ಸಲ್ಲಿಸಿ, ಇ-ವೆರಿಫಿಕೇಶನ್ ಪ್ರಕ್ರಿಯೆಯನ್ನೂ ಪೂರ್ಣಗೊಳಿಸುವಂತೆ ಸಲಹೆ ನೀಡಲಾಗಿದೆ.
ಆದಾಯ ತೆರಿಗೆ ಇಲಾಖೆಯ ಮಾಹಿತಿ ಪ್ರಕಾರ, ಈಗಾಗಲೇ 4.37 ಕೋಟಿಗೂ ಹೆಚ್ಚು ತೆರಿಗೆದಾರರು ಯಶಸ್ವಿಯಾಗಿ ತಮ್ಮ ಐಟಿಆರ್ ಸಲ್ಲಿಸಿದ್ದಾರೆ. ಡಿಜಿಟಲ್ ಇ-ಫೈಲಿಂಗ್ ವ್ಯವಸ್ಥೆಯನ್ನು ಹೆಚ್ಚಿನ ಸಂಖ್ಯೆಯಲ್ಲಿ ತೆರಿಗೆದಾರರು ಬಳಸುತ್ತಿರುವುದು ಇದರಿಂದ ಸ್ಪಷ್ಟವಾಗಿದೆ.

ತೆರಿಗೆ ತಜ್ಞರ ಪ್ರಕಾರ, ಫಾರ್ಮ್-16, ವಾರ್ಷಿಕ ಮಾಹಿತಿ ಹೇಳಿಕೆ (AIS), ಬ್ಯಾಂಕ್ ವಿವರಗಳು, ಹೂಡಿಕೆ ದಾಖಲೆಗಳು ಹಾಗೂ ಕಡಿತಗಳ ಮಾಹಿತಿಯನ್ನು ಮುಂಚಿತವಾಗಿ ಸಿದ್ಧಪಡಿಸಿಕೊಂಡರೆ ಕೇವಲ 10 ನಿಮಿಷಗಳಲ್ಲೇ ಐಟಿಆರ್ ಸಲ್ಲಿಕೆ ಪೂರ್ಣಗೊಳಿಸಬಹುದು.ನವ್ರಾಜ್ ಗ್ಲೋಬಲ್ ಅಡ್ವೈಸರ್ಸ್‌ನ ತೆರಿಗೆ ತಜ್ಞ ನಿಶಾಂತ್ ಶಂಕರ್ ಅವರ ಪ್ರಕಾರ, ಸರಿಯಾದ ತೆರಿಗೆ ಪದ್ಧತಿ ಮತ್ತು ಸೂಕ್ತ ಐಟಿಆರ್ ನಮೂನೆಯನ್ನು ಆಯ್ಕೆ ಮಾಡಿ, ಪೂರ್ವಭರ್ತಿ (Pre-filled) ಮಾಹಿತಿಯನ್ನು ಪರಿಶೀಲಿಸಿದರೆ ತಪ್ಪುಗಳನ್ನು ತಪ್ಪಿಸಿ ಶೀಘ್ರದಲ್ಲೇ ರಿಟರ್ನ್ಸ್ ಸಲ್ಲಿಸಬಹುದು.

ಎಸ್.ಕೆ. ಪಾಟೋಡಿಯಾ ಅಂಡ್ ಅಸೋಸಿಯೇಟ್ಸ್ ಎಲ್‌ಎಲ್‌ಪಿಯ ನೇರ ತೆರಿಗೆ ವಿಭಾಗದ ಸಹಾಯಕ ನಿರ್ದೇಶಕ ಮಿಹಿರ್ ತಣ್ಣಾ ಅವರ ಪ್ರಕಾರ, ₹50 ಲಕ್ಷದವರೆಗೆ ವಾರ್ಷಿಕ ಆದಾಯ ಹೊಂದಿರುವ ವೇತನದಾರರು (ಬಡ್ಡಿ ಹಾಗೂ ಲಾಭಾಂಶ ಸೇರಿ) ITR-1 ಮೂಲಕ ಅತ್ಯಂತ ಸುಲಭವಾಗಿ ರಿಟರ್ನ್ಸ್ ಸಲ್ಲಿಸಬಹುದು. ಆದರೆ ಕಂಪನಿಯ ನಿರ್ದೇಶಕರು ಅಥವಾ ಪಟ್ಟಿಯಲ್ಲಿಲ್ಲದ ಇಕ್ವಿಟಿ ಷೇರುಗಳಲ್ಲಿ ಹೂಡಿಕೆ ಹೊಂದಿರುವವರಿಗೆ ಈ ಸರಳೀಕೃತ ವ್ಯವಸ್ಥೆ ಅನ್ವಯಿಸುವುದಿಲ್ಲ.
ಜುಲೈ 31ರ ಗಡುವು ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ, ಕೊನೆಯ ಕ್ಷಣದವರೆಗೆ ಕಾಯದೆ ಅಗತ್ಯ ದಾಖಲೆಗಳನ್ನು ಪರಿಶೀಲಿಸಿ, ಐಟಿಆರ್ ಸಲ್ಲಿಕೆ ಮತ್ತು ಇ-ವೆರಿಫಿಕೇಶನ್ ಪ್ರಕ್ರಿಯೆಯನ್ನು ತಕ್ಷಣ ಪೂರ್ಣಗೊಳಿಸುವಂತೆ ತಜ್ಞರು ಸಲಹೆ ನೀಡಿದ್ದಾರೆ.