ಕ್ಯಾನ್ಸರ್ ಹರಡುವ ಮುನ್ನವೇ ರೂಪ ಬದಲಾಯಿಸುತ್ತಿದೆ! ಸಂಶೋಧನೆಯಿಂದ ಆಘಾತಕಾರಿ ಸತ್ಯ ಬಹಿರಂಗ!

ದೆಹಲಿ.ಜುಲೈ.20: ನನ್ನ ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿದೆ, ಸ್ಕ್ಯಾನಿಂಗ್ ವರದಿಗಳೂ ನಾರ್ಮಲ್ ಇವೆ. ಆದರೂ ಕ್ಯಾನ್ಸರ್ ಮತ್ತೆ ಏಕೆ ಮರುಕಳಿಸಿತು?– ಕ್ಯಾನ್ಸರ್ನಿಂದ ಗುಣಮುಖರಾಗುತ್ತಿರುವ ಬಹುತೇಕ ರೋಗಿಗಳನ್ನು ಕಾಡುವ ಅತಿ ದೊಡ್ಡ ಪ್ರಶ್ನೆ ಇದು. ಈ ನಿಗೂಢ ಪ್ರಶ್ನೆಗೆ ಈಗ ‘ಸೆಲ್ ಸ್ಟೆಮ್ ಸೆಲ್’ (Cell Stem Cell) ನಿಯತಕಾಲಿಕೆಯಲ್ಲಿ ಪ್ರಕಟವಾದ ಜಾಗತಿಕ ಮಟ್ಟದ ಹೊಸ ಸಂಶೋಧನೆಯೊಂದು ಮಹತ್ವದ ಸುಳಿವು ನೀಡಿದೆ.

ಕ್ಯಾನ್ಸರ್ ಕೋಶಗಳು ದೇಹದ ಇತರ ಭಾಗಗಳಿಗೆ ಹರಡುವ ಮುನ್ನ (Metastasis) ತಾತ್ಕಾಲಿಕವಾಗಿ ತಮ್ಮ ಗುರುತನ್ನೇ ಬದಲಾಯಿಸಿಕೊಳ್ಳುತ್ತವೆ. ಇದರಿಂದಾಗಿ ಅವು ದೇಹದ ರೋಗನಿರೋಧಕ ಶಕ್ತಿಯ ಕಣ್ಣಿಗೆ ಮಣ್ಣೆರಚಿ, ಬೇರೆ ಅಂಗಗಳಲ್ಲಿ ಹೊಸ ಗಡ್ಡೆಗಳನ್ನು (Tumours) ಸೃಷ್ಟಿಸುತ್ತವೆ ಎಂಬುದನ್ನು ಸಂಶೋಧಕರು ಪತ್ತೆಹಚ್ಚಿದ್ದಾರೆ.

ಪ್ರಸ್ತುತ ಈ ಸಂಶೋಧನೆಯು ಪ್ರಯೋಗಾಲಯದ ಹಂತದಲ್ಲಿದೆ. ಆದಾಗ್ಯೂ, ಕ್ಯಾನ್ಸರ್ ರೋಗಿಗಳ ಶೇಕಡಾ 90 ರಷ್ಟು ಸಾವುಗಳಿಗೆ ಕಾರಣವಾಗುವ ‘ಮೆಟಾಸ್ಟಾಸಿಸ್’ (ಕ್ಯಾನ್ಸರ್ ಹರಡುವಿಕೆ) ಪ್ರಕ್ರಿಯೆಯನ್ನು ತಡೆಯುವ ಹೊಸ ಚಿಕಿತ್ಸಾ ವಿಧಾನಗಳನ್ನು ಅಭಿವೃದ್ಧಿಪಡಿಸಲು ಇದು ಸಹಕಾರಿಯಾಗಲಿದೆ ಎಂದು ವಿಜ್ಞಾನಿಗಳು ನಂಬಿದ್ದಾರೆ.

ಕ್ಯಾನ್ಸರ್ ಕೋಶಗಳು ‘ರೂಪ’ ಬದಲಾಯಿಸುವುದು ಹೇಗೆ?
ಗೋಟೊ (Goto) ಮತ್ತು ಅವರ ತಂಡದ ನೇತೃತ್ವದಲ್ಲಿ ನಡೆದ ಈ ಸಂಶೋಧನೆಯ ಪ್ರಕಾರ, ಕೆಲವು ಕರುಳಿನ ಕ್ಯಾನ್ಸರ್ (Colorectal Cancer) ಕೋಶಗಳು ಮೂಲ ಗಡ್ಡೆಯಿಂದ ಹೊರಡುವ ಮುನ್ನ ತಾತ್ಕಾಲಿಕವಾಗಿ ಭ್ರೂಣದ ತರಹದ (Fetal-like) ಆದಿಮ ಸ್ಥಿತಿಗೆ ಬದಲಾಗುತ್ತವೆ. ಪರಿಣಿತರು ಈ ಪ್ರಕ್ರಿಯೆಯನ್ನು “ಪೊಲೀಸರಿಂದ ತಪ್ಪಿಸಿಕೊಳ್ಳಲು ಅಪರಾಧಿಯೊಬ್ಬ ಬಟ್ಟೆ ಬದಲಾಯಿಸುವ” ತಂತ್ರಕ್ಕೆ ಹೋಲಿಸಿದ್ದಾರೆ.

ಪಕ್ವವಾದ ಕರುಳಿನ ಕೋಶಗಳಂತೆ ವರ್ತಿಸುವ ಬದಲಿಗೆ, ಈ ಕ್ಯಾನ್ಸರ್ ಕೋಶಗಳು ಅತ್ಯಂತ ಹೊಂದಿಕೊಳ್ಳುವ ರೂಪಕ್ಕೆ ಬದಲಾಗುತ್ತವೆ. ಇದು ಅವುಗಳಿಗೆ ಒತ್ತಡದ ಪರಿಸ್ಥಿತಿಯನ್ನು ತಡೆದುಕೊಳ್ಳಲು, ರಕ್ತನಾಳಗಳ ಮೂಲಕ ಸುಲಭವಾಗಿ ಪ್ರಯಾಣಿಸಲು ಮತ್ತು ರೋಗನಿರೋಧಕ ವ್ಯವಸ್ಥೆಯಿಂದ ಅಡಗಿಕೊಳ್ಳಲು ಸಹಾಯ ಮಾಡುತ್ತದೆ. ಒಮ್ಮೆ ಅವು ದೇಹದ ಮತ್ತೊಂದು ಪ್ರಮುಖ ಅಂಗವನ್ನು (ಹೆಚ್ಚಾಗಿ ಯಕೃತ್ತು ಅಥವಾ ಲಿವರ್) ತಲುಪಿದ ತಕ್ಷಣ, ಮತ್ತೆ ತಮ್ಮ ಹಳೆಯ ರೂಪಕ್ಕೆ ಮರಳಿ ದ್ವಿತೀಯ ಹಂತದ ಗಡ್ಡೆಯನ್ನು ಬೆಳೆಸಲು ಆರಂಭಿಸುತ್ತವೆ.

ಚಿಕಿತ್ಸೆ ಯಶಸ್ವಿಯಾದ ನಂತರವೂ ಕ್ಯಾನ್ಸರ್ ಏಕೆ ಮರುಕಳಿಸುತ್ತದೆ ಎಂಬುದಕ್ಕೆ ಈ ‘ರೂಪ ಬದಲಿಸುವ’ ಸಾಮರ್ಥ್ಯವೇ ಪ್ರಮುಖ ಕಾರಣ ಎನ್ನಲಾಗಿದೆ.

ಎಪಿಜೆನೆಟಿಕ್ಸ್ (Epigenetics) ವಹಿಸುವ ಪಾತ್ರ
ಈ ಸಂಶೋಧನೆಯಲ್ಲಿ ಕಂಡುಬಂದ ಅತ್ಯಂತ ಆಶ್ಚರ್ಯಕರ ಸಂಗತಿಯೆಂದರೆ, ಕ್ಯಾನ್ಸರ್ ಕೋಶಗಳ ಈ ರೂಪಾಂತರಕ್ಕೆ ಯಾವುದೇ ಹೊಸ ಜೀನ್ ರೂಪಾಂತರಗಳು (Genetic Mutations) ಕಾರಣವಲ್ಲ!

ಬದಲಿಗೆ, ಇದು ‘ಎಪಿಜೆನೆಟಿಕ್ ರಿಪ್ರೋಗ್ರಾಮಿಂಗ್’ ಎಂಬ ಪ್ರಕ್ರಿಯೆಯ ಮೂಲಕ ನಡೆಯುತ್ತದೆ. ಇದರಲ್ಲಿ ಡಿಎನ್ಎ (DNA) ಸಂರಚನೆಯನ್ನು ಬದಲಾಯಿಸದೆ ಕೇವಲ ಜೀನ್ಗಳನ್ನು ಆನ್ ಅಥವಾ ಆಫ್ ಮಾಡಲಾಗುತ್ತದೆ. ಈ ಗುರುತಿನ ಬದಲಾವಣೆಗೆ ‘GATA6’ ಎಂಬ ಪ್ರೋಟೀನ್ ಕೊರತೆಯೇ ಮುಖ್ಯ ಕಾರಣ ಎಂದು ಸಂಶೋಧಕರು ಗುರುತಿಸಿದ್ದಾರೆ. ಈ ಪ್ರೋಟೀನ್ ಸಾಮಾನ್ಯವಾಗಿ ಕರುಳಿನ ಕೋಶಗಳ ನೈಜ ಗುರುತನ್ನು ಕಾಯ್ದುಕೊಳ್ಳಲು ಸಹಾಯ ಮಾಡುತ್ತದೆ. ಆದರೆ ಇದು ಇಲ್ಲದಾದಾಗ, ಕ್ಯಾನ್ಸರ್ ಕೋಶಗಳು ಹೆಚ್ಚು ಸುಲಭವಾಗಿ ರೂಪಾಂತರಗೊಂಡು ಹರಡಲು ಆರಂಭಿಸುತ್ತವೆ.

ಕ್ಯಾನ್ಸರ್ ಹರಡುವಿಕೆ (Metastasis) ಏಕೆ ಅಪಾಯಕಾರಿ?
ಕ್ಯಾನ್ಸರ್ ಕೋಶಗಳು ಮೂಲ ಜಾಗದಿಂದ ದೇಹದ ಇತರ ಭಾಗಗಳಿಗೆ ಹರಡುವುದನ್ನು ‘ಮೆಟಾಸ್ಟಾಸಿಸ್’ ಎನ್ನಲಾಗುತ್ತದೆ. ಕರುಳಿನ ಕ್ಯಾನ್ಸರ್ ಸಾಮಾನ್ಯವಾಗಿ ಯಕೃತ್ತಿಗೆ (Liver) ಹರಡುತ್ತದೆ. ಇದಲ್ಲದೆ ಶ್ವಾಸಕೋಶ ಹಾಗೂ ದುಗ್ಧರಸ ಗ್ರಂಥಿಗಳಿಗೂ (Lymph Nodes) ಹರಡಬಹುದು. ಒಮ್ಮೆ ಕ್ಯಾನ್ಸರ್ ಇತರ ಅಂಗಗಳಿಗೆ ಹರಡಿದರೆ, ಚಿಕಿತ್ಸೆ ಸಂಕೀರ್ಣವಾಗುತ್ತದೆ ಮತ್ತು ಬದುಕುಳಿಯುವ ಸಾಧ್ಯತೆಗಳು ಕ್ಷೀಣಿಸುತ್ತವೆ. ಆದ್ದರಿಂದಲೇ ಇದರ ಮುಂಚಿತ ಪತ್ತೆ ಮತ್ತು ತಡೆಗಟ್ಟುವಿಕೆ ಅತ್ಯಂತ ನಿರ್ಣಾಯಕವಾಗಿದೆ.

ರೋಗಿಗಳಿಗೆ ಇದರ ಅರ್ಥವೇನು?
ಕ್ಯಾನ್ಸರ್ ಜೀವವಿಜ್ಞಾನವನ್ನು ಅರ್ಥಮಾಡಿಕೊಳ್ಳುವಲ್ಲಿ ಇದು ದೊಡ್ಡ ಮೈಲಿಗಲ್ಲಾದರೂ, ರೋಗಿಗಳು ಸದ್ಯಕ್ಕೆ ಚಾಲ್ತಿಯಲ್ಲಿರುವ ವೈದ್ಯಕೀಯ ಚಿಕಿತ್ಸೆಗಳನ್ನೇ ಮುಂದುವರಿಸಬೇಕು ಎಂದು ವೈದ್ಯರು ಸಲಹೆ ನೀಡಿದ್ದಾರೆ. ಕ್ಯಾನ್ಸರ್ ಹರಡುವುದನ್ನು ತಡೆಯುವ ಸ್ಮಾರ್ಟ್ ಮತ್ತು ವೈಯಕ್ತಿಕ ಚಿಕಿತ್ಸೆಗಳನ್ನು (Personalized Therapies) ಭವಿಷ್ಯದಲ್ಲಿ ರೂಪಿಸಲು ಈ ಸಂಶೋಧನೆ ದಾರಿದೀಪವಾಗಲಿದೆ.