‘ಜುರಾಸಿಕ್ ಪಾರ್ಕ್’ ಖ್ಯಾತಿಯ ಹಿರಿಯ ನಟ ಸ್ಯಾಮ್ ನೀಲ್ ನಿಧನ

ಸಿಡ್ನಿ.ಜುಲೈ.13 :’ಜುರಾಸಿಕ್ ಪಾರ್ಕ್’ ಚಲನಚಿತ್ರ ಸರಣಿಯಲ್ಲಿ ಡಾ. ಅಲಾನ್ ಗ್ರಾಂಟ್ ಪಾತ್ರದ ಮೂಲಕ ಜಗತ್ತಿನಾದ್ಯಂತ ಅಪಾರ ಜನಪ್ರಿಯತೆ ಗಳಿಸಿದ್ದ ನ್ಯೂಜಿಲೆಂಡ್ ಮೂಲದ ಖ್ಯಾತ ನಟ ಸ್ಯಾಮ್ ನೀಲ್ (78) ಅವರು ಸೋಮವಾರ ಆಸ್ಟ್ರೇಲಿಯಾದ ಸಿಡ್ನಿಯಲ್ಲಿ ನಿಧನರಾಗಿದ್ದಾರೆ.

ಸ್ಯಾಮ್ ನೀಲ್ ಅವರ ನಿಧನದ ಸುದ್ದಿಯನ್ನು ಅವರ ಕುಟುಂಬಸ್ಥರು ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯ ಮೂಲಕ ಖಚಿತಪಡಿಸಿದ್ದಾರೆ. “ಸ್ಯಾಮ್ ನೀಲ್ ಅವರು ಜುಲೈ 13ರ ಸೋಮವಾರದಂದು ಸಿಡ್ನಿಯಲ್ಲಿ ಕೊನೆಯುಸಿರೆಳೆದಿದ್ದಾರೆ ಎಂದು ತಿಳಿಸಲು ನಮಗೆ ತೀವ್ರ ದುಃಖವಾಗುತ್ತಿದೆ. ಕೊನೆಯ ಕ್ಷಣದಲ್ಲಿ ಅವರು ಕುಟುಂಬಸ್ಥರ ನಡುವೆ ಇದ್ದರು” ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಕ್ಯಾನ್ಸರ್ ಮುಕ್ತರಾಗಿದ್ದರೂ ಎದುರಾದ ಹಠಾತ್ ಸಾವು
ಸ್ಯಾಮ್ ನೀಲ್ ಅವರು ಕಳೆದ ಐದು ವರ್ಷಗಳಿಂದ ತೀವ್ರ ಸ್ವರೂಪದ ‘ನಾನ್-ಹಾಡ್ಜ್ಕಿನ್ ಲಿಂಫೋಮಾ’ (ರಕ್ತದ ಕ್ಯಾನ್ಸರ್) ಕಾಯಿಲೆಯಿಂದ ಬಳಲುತ್ತಿದ್ದರು. ಆದರೆ, ಇತ್ತೀಚೆಗಷ್ಟೇ ಅವರು ಕ್ಯಾನ್ಸರ್ನಿಂದ ಸಂಪೂರ್ಣ ಗುಣಮುಖರಾಗಿದ್ದರು.

ಕುಟುಂಬಸ್ಥರು ನೀಡಿರುವ ಹೇಳಿಕೆಯ ಪ್ರಕಾರ, “ಅವರ ಸಾವು ತೀರಾ ಹಠಾತ್ ಮತ್ತು ನಿರೀಕ್ಷಿಸದ ಘಟನೆಯಾಗಿದೆ. ಆದರೆ, ಅವರು ಕ್ಯಾನ್ಸರ್ ಮುಕ್ತರಾಗಿ ಕೊನೆಯುಸಿರೆಳೆದರು ಎನ್ನುವುದಷ್ಟೇ ನಮಗೆ ಸಮಾಧಾನದ ಸಂಗತಿ” ಎಂದು ಹೇಳಿದ್ದಾರೆ. ಅಲ್ಲದೆ, ಅವರಿಗೆ ಸೂಕ್ತ ಚಿಕಿತ್ಸೆ ನೀಡಿದ ‘ಸೇಂಟ್ ವಿನ್ಸೆಂಟ್ಸ್ ಪ್ರೈವೇಟ್ ಹಾಸ್ಪಿಟಲ್’ ಸಿಬ್ಬಂದಿಗೆ ಕುಟುಂಬ ಧನ್ಯವಾದ ಅರ್ಪಿಸಿದೆ.

ಕ್ಯಾನ್ಸರ್ ವಿರುದ್ಧ ಹೋರಾಡಿದ್ದ ಸ್ಯಾಮ್
ಈ ವರ್ಷದ ಏಪ್ರಿಲ್ ತಿಂಗಳಿನಲ್ಲಿ ಆಸ್ಟ್ರೇಲಿಯಾದ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಸ್ಯಾಮ್ ನೀಲ್ ತಮಗೆ ಕೀಮೋಥೆರಪಿ ಚಿಕಿತ್ಸೆ ಫಲಿಸದಿದ್ದಾಗ, ‘CAR T-cell’ ಎಂಬ ಅತ್ಯಾಧುನಿಕ ತಳಿ ಚಿಕಿತ್ಸೆ (Genetic Therapy) ಮೂಲಕ ತಾವು ಕ್ಯಾನ್ಸರ್ನಿಂದ ಸಂಪೂರ್ಣ ಗುಣಮುಖರಾಗಿರುವುದಾಗಿ ಹೆಮ್ಮೆಯಿಂದ ಹೇಳಿಕೊಂಡಿದ್ದರು. “ನನ್ನ ದೇಹದಲ್ಲಿ ಈಗ ಯಾವುದೇ ಕ್ಯಾನ್ಸರ್ ಅಂಶಗಳಿಲ್ಲ” ಎಂದು ಅವರು ತಿಳಿಸಿದ್ದರು. ಆದರೆ ವಿಧಿಯ ಆಟ ಬೇರೆಯದ್ದೇ ಆಗಿತ್ತು.

ಸ್ಯಾಮ್ ನೀಲ್ ಸಿನಿ ಪಯಣ
1977 ರ ‘ಸ್ಲೀಪಿಂಗ್ ಡಾಗ್ಸ್’ ಚಿತ್ರದ ಮೂಲಕ ನಟನಾ ರಂಗಕ್ಕೆ ಪಾದಾರ್ಪಣೆ ಮಾಡಿದ ಸ್ಯಾಮ್, ನಂತರ ‘ಡೆಡ್ ಕಾಮ್’, ‘ದಿ ಪಿಯಾನೋ’ ನಂತಹ ಹಲವು ಯಶಸ್ವಿ ಚಿತ್ರಗಳಲ್ಲಿ ನಟಿಸಿದರು. ಆದರೆ 1993 ರಲ್ಲಿ ತೆರೆಕಂಡ ಸ್ಟೀವನ್ ಸ್ಪಿಲ್ಬರ್ಗ್ ನಿರ್ದೇಶನದ ‘ಜುರಾಸಿಕ್ ಪಾರ್ಕ್’ ಚಿತ್ರ ಇವರಿಗೆ ಜಾಗತಿಕ ಮನ್ನಣೆ ತಂದುಕೊಟ್ಟಿತು. ಇದಾದ ಬಳಿಕ ಜುರಾಸಿಕ್ ಪಾರ್ಕ್ 3 (2001) ಮತ್ತು ಜುರಾಸಿಕ್ ವರ್ಲ್ಡ್ ಡೊಮಿನಿಯನ್ (2022) ಚಿತ್ರಗಳಲ್ಲೂ ಅವರು ಡಾ. ಅಲಾನ್ ಗ್ರಾಂಟ್ ಆಗಿ ಅಬ್ಬರಿಸಿದ್ದರು.