ಸುದ್ದಿಒನ್,ಬೆಂಗಳೂರು,ಮೇ.23: ಜಗತ್ತಿಗೆ ಮತ್ತೊಂದು ಮಾರಕ ವೈರಸ್ ಆತಂಕ ಶುರುವಾಗಿದೆ. ಆಫ್ರಿಕಾ ಖಂಡದ ದೇಶಗಳಲ್ಲಿ ಭೀತಿ ಸೃಷ್ಟಿಸುತ್ತಿರುವ ಎಬೋಲಾ ವೈರಸ್ (Ebola Virus Disease – EVD) ಹರಡುವಿಕೆಯನ್ನು ತಡೆಯಲು ಕರ್ನಾಟಕ ಸರ್ಕಾರ ಈಗಿನಿಂದಲೇ ಕಟ್ಟುನಿಟ್ಟಿನ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡಿದೆ. ಈ ಕುರಿತು ರಾಜ್ಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು ಸಾರ್ವಜನಿಕರಿಗೆ ಮಹತ್ವದ ಮಾರ್ಗಸೂಚಿಯೊಂದನ್ನು ಬಿಡುಗಡೆ ಮಾಡಿದೆ.
ವಿಶ್ವ ಆರೋಗ್ಯ ಸಂಸ್ಥೆಯು (WHO) ಆಫ್ರಿಕಾದ ಉಗಾಂಡಾ ಹಾಗೂ ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ ದೇಶಗಳಲ್ಲಿ ಎಬೋಲಾ ಅಟ್ಟಹಾಸವನ್ನು ಗಮನಿಸಿ, ಇದನ್ನು “ಅಂತರರಾಷ್ಟ್ರೀಯ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ” ಎಂದು ಘೋಷಿಸಿದೆ. ಭಾರತದಲ್ಲಿ ಸದ್ಯಕ್ಕೆ ಯಾವುದೇ ಪ್ರಕರಣಗಳು ಪತ್ತೆಯಾಗದಿದ್ದರೂ, ಜಾಗತಿಕ ಪ್ರಯಾಣ ಮತ್ತು ವ್ಯಾಪಾರದ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಮುಂಚಿತವಾಗಿಯೇ ಅಲರ್ಟ್ ಆಗಿದೆ.
ಏನಿದು ಎಬೋಲಾ? ಇದರ ಪ್ರಮುಖ ಲಕ್ಷಣಗಳೇನು?
ಎಬೋಲಾ ಎಂಬುದು ಮನುಷ್ಯರನ್ನು ತೀವ್ರವಾಗಿ ಕಾಡುವ ಮತ್ತು ಪ್ರಾಣಕ್ಕೆ ಕುತ್ತು ತರುವ ಒಂದು ಅಪಾಯಕಾರಿ ವೈರಲ್ ಸೋಂಕಾಗಿದೆ. ಈ ಕಾಯಿಲೆ ಬಂದವರಲ್ಲಿ ಸಾಮಾನ್ಯವಾಗಿ ಕೆಳಗಿನ ಲಕ್ಷಣಗಳು ಗೋಚರಿಸುತ್ತವೆ:
ಕಣ್ಣು ಕೆಂಪಾಗುವುದು ಮತ್ತು ಮೈಮೇಲೆ ದದ್ದುಗಳು ಏಳುವುದು.
ವಿಪರೀತ ಜ್ವರ ಹಾಗೂ ತಡೆಯಲಾಗದ ತಲೆನೋವು.
ಸ್ನಾಯುಗಳಲ್ಲಿ ಅತಿಯಾದ ನೋವು ಮತ್ತು ಗಂಟಲು ಕೆರೆತ.
ನಿರಂತರ ವಾಂತಿ, ತೀವ್ರ ಹೊಟ್ಟೆನೋವು ಹಾಗೂ ಭೇದಿ.
ಸೋಂಕು ಹರಡುವುದು ಹೇಗೆ?
ಈ ವೈರಸ್ ಗಾಳಿಯಲ್ಲಿ ಹರಡುವುದಿಲ್ಲ. ಬದಲಿಗೆ, ಸೋಂಕಿತ ವ್ಯಕ್ತಿಯ ರಕ್ತ, ಬೆವರು, ಲಾಲಾರಸ ಅಥವಾ ದೇಹದ ಇತರ ದ್ರವಗಳ ನೇರ ಸಂಪರ್ಕಕ್ಕೆ ಬರುವುದರಿಂದ ಹರಡುತ್ತದೆ. ಅಷ್ಟೇ ಅಲ್ಲದೆ, ರೋಗಿಗಳು ಬಳಸಿದ ಬಟ್ಟೆ, ಹಾಸಿಗೆ ಹಾಗೂ ಇಂಜೆಕ್ಷನ್ ಸೂಜಿಗಳನ್ನು ಮುಟ್ಟುವುದರಿಂದಲೂ ಇದು ಮತ್ತೊಬ್ಬರಿಗೆ ತಗಲುವ ಸಾಧ್ಯತೆ ದಟ್ಟವಾಗಿರುತ್ತದೆ. ಹೀಗಾಗಿ ರೋಗಿಗಳ ಆರೈಕೆ ಮಾಡುವ ವೈದ್ಯರು ಮತ್ತು ಕುಟುಂಬಸ್ಥರು ಹೆಚ್ಚಿನ ಜಾಗ್ರತೆ ವಹಿಸಬೇಕಾಗುತ್ತದೆ.
ಕರ್ನಾಟಕ ಸರ್ಕಾರದ ಕಟ್ಟುನಿಟ್ಟಿನ ಸಿದ್ಧತೆಗಳು
ರಾಜ್ಯದಲ್ಲಿ ಎಬೋಲಾ ಹರಡದಂತೆ ತಡೆಯಲು ಆರೋಗ್ಯ ಇಲಾಖೆ ಯುದ್ಧೋಪಾದಿಯಲ್ಲಿ ಸಿದ್ಧತೆ ಮಾಡಿಕೊಂಡಿದೆ:
ಏರ್ಪೋರ್ಟ್ ನಿಗಾ: ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಗಳು ಮತ್ತು ಗಡಿ ಭಾಗಗಳಲ್ಲಿ ವಿದೇಶಿ ಪ್ರಯಾಣಿಕರ ಮೇಲೆ ತೀವ್ರ ನಿಗಾ ಇರಿಸಲಾಗಿದೆ.
ಕ್ವಾರಂಟೈನ್ ಬೆಡ್ಗಳು: ಶಂಕಿತರನ್ನು ಪ್ರತ್ಯೇಕವಾಗಿಡಲು ಐಸೋಲೇಷನ್ ವಾರ್ಡ್ ಹಾಗೂ ಸೂಕ್ತ ಆಂಬುಲೆನ್ಸ್ ವ್ಯವಸ್ಥೆ ಕಲ್ಪಿಸಲಾಗಿದೆ.
ವಿಶೇಷ ತರಬೇತಿ: ವೈದ್ಯಕೀಯ ಸಿಬ್ಬಂದಿಗೆ ಸೋಂಕು ನಿಯಂತ್ರಣದ ಬಗ್ಗೆ ವಿಶೇಷ ಗೈಡ್ಲೈನ್ಸ್ ನೀಡಲಾಗುತ್ತಿದ್ದು, ಪಿಪಿಇ ಕಿಟ್ ಹಾಗೂ ಅಗತ್ಯ ಔಷಧಿಗಳನ್ನು ದಾಸ್ತಾನು ಮಾಡಿಕೊಳ್ಳಲಾಗಿದೆ.
ತ್ವರಿತ ಕಾರ್ಯಪಡೆ: ಪರಿಸ್ಥಿತಿಯನ್ನು ನಿಭಾಯಿಸಲು ತಕ್ಷಣ ಸ್ಪಂದಿಸುವ ‘ತ್ವರಿತ ಪ್ರತಿಕ್ರಿಯಾ ತಂಡಗಳನ್ನು’ (RRT) ರಚಿಸಲಾಗಿದೆ.
