ನಾನಾ-ನೀನಾ ಅಂತ ಕಿತ್ತಾಡುತ್ತಿದ್ದ ರೆಡ್ಡಿ-ರಾಮುಲು ಸೈಲೆಂಟ್ ಆಗಿದ್ದೇಕೆ : ನಡುವಲ್ಲಿ ಸಮಾಧಾನ ಮಾಡಿದ್ಯಾರು..?

ಕಳೆದ ಕೆಲವು ದಿನಗಳಿಂದ ಬಿಜೆಪಿಯಲ್ಲಿ ಭಿನ್ನಮತ ಸ್ಪೋಟಗೊಂಡಿತ್ತು. ಕೋರ್ ಕಮಿಟಿ ಸಭೆ ಆದ ಮೇಲೆ ಶ್ರೀರಾಮುಲು ಹಾಗೂ ಜನಾರ್ದನ ರೆಡ್ಡಿ ನಡುವೆ ನಾನಾ – ನೀನಾ ಯುದ್ಧ ಶುರುವಾಗಿತ್ತು. ಕೋರ್ ಕಮಿಟಿ ಸಭೆಯಲ್ಲಿ ರಾಜ್ಯ ಬಿಜೆಪಿ ಉಸ್ತುವಾರಿ ರಾಧಾ ಮೋಹನ್ ದಾಸ್ ಆಡಿದ ಮಾತುಗಳಿಂದ ಮನನೊಂದು ಶ್ರೀರಾಮುಲು ಅವರು ಪಕ್ಷವನ್ನೇ ಬಿಡುವ ಮಾತನಾಡಿದ್ದರು‌. ಜನಾರ್ದನ ರೆಡ್ಡಿ ಅವರೇ ಕುತಂತ್ರ ಮಾಡುತ್ತಿದ್ದಾರೆ ಎಂದು ಆರೋಪಿಸಿದ್ದರು. ಇದಕ್ಕೆ ಪ್ರತಿಯಾಗಿ ಜನಾರ್ದನ ರೆಡ್ಡಿ ಅವರು ತಿರುಗೇಟು ನೀಡಿದ್ದರು.

ಜನಾರ್ದನ ರೆಡ್ಡಿ ಹಾಗೂ ಶ್ರೀರಾಮುಲು ಅವರು ಒಬ್ಬರಿಗೊಬ್ಬರು ಸುದ್ದಿಗೋಷ್ಟಿ ನಡೆಸಿ, ಆರೋಪ – ಪ್ರತ್ಯಾರೋಪ ಮಾಡುವುದಕ್ಕೆ ಶುರುವಾಗಿತ್ತು. ಇದು ಪಕ್ಷದ ಬೆಳವಣಿಗೆಗೆ ಸರಿ ಅಲ್ಲ ಎಂಬುದು ತಿಳಿದ ಹೈಕಮಾಂಡ್ ಮಧ್ಯ ಪ್ರವೇಶ ಮಾಡಿದೆ ಎನ್ನಲಾಗಿದೆ. ಶ್ರೀರಾಮುಲು ಅವರಿಗೆ ಕರೆ ಮಾಡಿ, ದೆಹಲಿಗೆ ಬರುವಂತೆ ಹೇಳಿದ್ದಾರೆ ಎಂದು ಶ್ರೀರಾಮುಲು ಆಪ್ತ ಮೂಲಗಳು ತಿಳಿಸಿವೆ.

ಜೆಪಿ ನಡ್ಡಾ ಅವರು ಕರೆ ಮಾಡಿ, ಮುಂದಿನ ವಾರ ದೆಹಲಿಗೆ ಬನ್ನಿ, ಇಲ್ಲಿಯೇ ಎಲ್ಲಾ ಮಾತಾಡೋಣಾ. ಈ ಸಮಸ್ಯೆಯನ್ನು ನಾಲ್ಕು ಗೋಡೆಗಳ ಮಧ್ಯೆ ಕುಳಿತು ಬಗೆಹರಿಸಿಕೊಳ್ಳಬೇಕಿದೆ. ಕಳೆದ 35-40 ವರ್ಷದಿಂದ ನೀವಿಬ್ಬರು ಒಟ್ಟಿಗೆ ಬೆಳೆದಿದ್ದೀರಿ, ಯಾವುದೋ ಕಾರಣಕ್ಕೆ ಹಾದಿ ಬೀದಿ ರಂಪ ಮಾಡಿಕೊಳ್ಳಬೇಡಿ. ನಾನೊಂದು ತೀರಾ, ನೀನೊಂದು ತೀರಾ ಅನ್ನುವಂತಾಗುವುದು ಬೇಡ. ನಿಮ್ಮಿಬ್ಬರ ಮಧ್ಯೆ ಎದ್ದಿರುವ ಭಿನ್ನಾಭಿಪ್ರಾಯವನ್ನು ನೀವಿಬ್ಬರೆ ಮಾತಾಡಿ ಬಗೆಹರಿಸಿಕೊಳ್ಳಿ. ಇನ್ನೆರಡು ದಿನದಲ್ಲಿ ಭಿನ್ನಾಭಿಪ್ರಾಯಕ್ಕೆ ತೆರೆ ಎಳೆದು ದೆಹಲಿಗೆ ಬನ್ನಿ ಎಂದಿದ್ದಾರೆ ಎನ್ನಲಾಗಿದೆ. ಹೈಕಮಾಂಡ್ ಸೂಚನೆಯ ಮೇರೆಗೆ ಇಬ್ಬರು ಸೈಲೆಂಟ್ ಆಗಿದ್ದು, ದೆಹಲಿಗೆ ಹೋಗಿ ಬಂದ ಮೇಲೆ ಶ್ರೀರಾಮುಲು ಯಾವ ರೀತಿ ಬದಲಾಗುತ್ತಾರೆ ನೋಡಬೇಕಿದೆ.