ಡ್ರೆಸ್ಸಿಂಗ್ ರೂಮ್ ಸೀಕ್ರೆಟ್ ರಿವಿಲ್ ಮಾಡಿದ್ದು ಸರ್ಫರಾಜ್ ಖಾನ್ : ಆರೋಪ ಸಾಬೀತಾದ್ರೆ ಏನಾಗಬಹುದು..?

ಇತ್ತೀಚೆಗೆ ಟೀಂ ಇಂಡಿಯಾದಲ್ಲಿ ಡ್ರೆಸ್ಸಿಂಗ್ ರೂಂ ಸೀಕ್ರೆಟ್ ಬಾರೀ ಚರ್ಚೆಗೆ ಗ್ರಾಸವಾಗಿದೆ. ಟೀಂ ಇಂಡಿಯಾದಲ್ಲಿ ಎಲ್ಲವೂ ಸರಿ ಇಲ್ಲ ಎಂಬ ಮಟ್ಟಿಗೆ ಬಂದಿದೆ. ಅದರಲ್ಲೂ ಆಸ್ಟ್ರೇಲಿಯಾ ತಲುಪಿದ ಮೇಲೆ ಬಂಡಾಯದ ಬಿಸಿ ಜೋರಾಗಿದೆ. ಇದಕ್ಕೆಲ್ಲ ಕಾರಣ ಡ್ರೆಸ್ಸಿಂಗ್ ರೂಂ ಸೀಕ್ರೆಟ್ ಒಂದೊಂದಾಗಿಯೇ ಹೊರಗೆ ಬರುತ್ತಿರುವುದು. ಇದರ ನಡುವೆ ಈ ಡ್ರೆಸ್ಸಿಂಗ್ ರೂಂ ಸೀಕ್ರೆಟ್ ರಿವೀಲ್ ಮಾಟ್ತಿದ್ದವರು ಯಾರೂ ಎಂಬ ಹುಡುಕಾಟ ಶುರುವಾಗಿದೆ. ಈಗ ನೇರವಾಗಿ ಈ ಆರೋಪ ಹೊತ್ತಿರುವುದು ಮುಂಬೈಕರ್ ಸರ್ಫರಾಜ್ ಖಾನ್.

ಈ ವಿಚಾರವನ್ನು ಟೀಂ ಇಂಡಿಯಾದ ಮುಖ್ಯ ಕೋಚ್ ಗೌತಮ್ ಗಂಭೀರ್ ರಿವ್ಯೂವ್ ಮೀಟಿಂಗ್ ನಲ್ಲಿ ಮಾತನಾಡಿದ್ದಾರೆ. ಡ್ರೆಸ್ಸಿಂಗ್ ರೂಂ ಸೀಕ್ರೆಟ್ ರಿವಿಲ್ ಬಗ್ಗೆ ಈಗಾಗಲೇ ಬಿಸಿಸಿಐಗೆ ದೂರು ನೀಡಿರುವ ಗಂಭೀರ್, ಸರ್ಫರಾಜ್ ಖಾನ್ ವಿರುದ್ಧವೂ ದೂರು ನೀಡಿದ್ದಾರೆ. ಮೊದಲೇ ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರ ಹುದ್ದೆಯ ಮೇಲೆಯೇ ತೂಗುಗತ್ತಿ ನೇತಾಡುತ್ತಿದೆ. ಹೀಗಿರುವಾಗ ಈ ಅವಾಂತರವನ್ನೆಲ್ಲ ಸರಿ ಮಾಡಬೇಕಿದೆ.

ಅಷ್ಟಕ್ಕೂ ಏನಿದು ಸೀಕ್ರೆಟ್..?

ಮೆಲ್ಬೋರ್ನ್ ಟೆಸ್ಟ್ ಸೋಲಿನ ಬೆನ್ನಲ್ಲೇ ಗಂಭೀರ್ ಅವರು ರೋಹಿತ್ ಶರ್ಮಾ ಹಾಗೂ ವಿರಾಟ್ ಕೊಹ್ಲಿ ಸೇರಿದಂತೆ ಇಡೀ ತಂಡದ ಮೇಲೆ ಹರಿಹಾಯ್ದಿದ್ದರಂತೆ. ಇಷ್ಟು ದಿನ ಮುಕ್ತವಾಗಿ ಆಡಲು ಬಿಟ್ಟಿದ್ದೆ. ಇನ್ಮುಂದೆ ನಾನು ಮಾಡಿದ ಪ್ಲ್ಯಾನ್ ನಂತೆ ಆಡಿ. ಇಲ್ವಾ ಹೊರಗೆ ನಡೀತಾ ಇರಿ ಎಂದು ಹೇಳಿದ್ದರಂತೆ. ಸರ್ಫರಾಜ್ ಈ ಎಲ್ಲಾ ವಿಚಾರಗಳನ್ನು ತಮ್ಮ ಆಪ್ತ ಬಳಗದಲ್ಲಿ ಹಂಚಿಕೊಂಡಿದ್ದಾರೆ ಎಂಬ ಅನುಮಾನವನ್ನು ಹುಟ್ಟು ಹಾಕಿದ್ದು, ಗೌತಮ್ ಗಂಭೀರ್ ಕೂಡ ದೂರು ನೀಡಿದ್ದಾರೆ.