ಪುನೀತ್ ಸಮಾಧಿ ನೋಡಲು ತುಮಕೂರಿನಿಂದ ಎತ್ತಿನಗಾಡಿಯಲ್ಲೇ ಬಂದ ಅಭಿಮಾನಿ..!

ಬೆಂಗಳೂರು: ಪುನೀತ್ ರಾಜ್‍ಕುಮಾರ್ ಅವರನ್ನ ಪ್ರೀತಿಸುವ ಅಪಾರ ಅಭಿಮಾನಿ ಬಳಗವೇ ಇದೆ. ಪುನೀತ್ ಕೂಡ ಅಭಿಮಾನಿಗಳ ಬಳಿ ಹಾಗೆಯೇ ಇದ್ರು. ಅವರಿಲ್ಲ ಅನ್ನೋದನ್ನ ಯಾರಿಂದಲೂ ಅರಗಿಸಿಕೊಳ್ಳಲು ಆಗುತ್ತಿಲ್ಲ. ಅವರ ಅಂತಿಮ ದರ್ಶನ ಮಾಡಲು ಆಗದವರು ಅವರ ಸಮಾಧಿ ದರ್ಶನವನ್ನಾದರೂ ಮಾಡಿ ಪುನೀತರಾಗೋಣಾ ಅನ್ನೋ ಭಾವನೆ ಹೊಂದಿದ್ದಾರೆ. ಅದಕ್ಕಾಗಿಯೇ ಈಗಲೂ ಅವರ ಸಮಾಧಿ ದರ್ಶನ ಮಾಡಲು ದೂರದೂರುಗಳಿಂದ ಬರ್ತಾ ಇದ್ದಾರೆ.

ಇಲ್ಲೊಬ್ಬ ಅಭಿಮಾನಿ ಸಮಾಧಿ ದರ್ಶನಕ್ಕೆ ಎತ್ತಿನಗಾಡಿಯಲ್ಲಿ ಬಂದಿದ್ದಾರೆ. ತುಮಕೂರು ಜಿಲ್ಲೆಯ ಪಾವಗಡದಿಂದ ಎತ್ತಿನಗಾಡಿಯಲ್ಲಿಯೇ ಬಂದಿದ್ದಾರೆ. ಎತ್ತಿನ ಗಾಡಿಗೆ ಅಪ್ಪು ಪೋಟೋ ಹಾಕಿಕೊಂಡು ಬಂದ ಅಭಿಮಾನ ಮೆರೆದಿದ್ದಾರೆ. ನಿನ್ನೆ ಸಂಜೆ ಆರು ಗಂಟೆ ಗೆ ಪಾವಗಡ ಬಿಟ್ಟು ಮಧ್ಯರಾತ್ರಿ‌ ಕಂಠೀರವ ಸ್ಟೇಡಿಯಂ ತಲುಪಿದ್ದಾರೆ.

ದಯಾನಂದ್ ಎಂಬಾತ ಹೀಗೆ ಪಾವಗಡದಿಂದ ಎತ್ತಿನಗಾಡಿಯಲ್ಲಿ ಬಂದಿರೋ ಅಭಿಮಾನಿ. ಶಿವಣ್ಣ ಅವರನ್ನು ಭೇಟಿ ಮಾಡಬೇಕು. ಅಣ್ಣನ್ನ ನಾವು ಕಳೆದುಕೊಂಡಿದೀವಿ ಶಿವಣ್ಣರನ್ನ ಮಾತಾಡಿಸಬೇಕು ಎಂದು ಆ ಅಭಿಮಾನಿ‌ ಮನವಿ ಮಾಡಿಕೊಂಡಿದ್ದಾನೆ.

ಅಪ್ಪು ಸರ್ ರೈತರಿಗೆ ತುಂಬಾ ಸಹಾಯ ಮಾಡಿದ್ದಾರೆ ಆಗಾಗಿ ಎತ್ತಿನಗಾಡಿಲಿ ದರ್ಶನಕ್ಕೆ ಬಂದೆ. ಮೂರು ದಿನದಿಂದ ಊಟ ಮಾಡಿಲ್ಲ, ನಿದ್ದೆ ಮಾಡಿಲ್ಲ ಬೇಸಾಯ ಮಾಡಿಲ್ಲ. ಅಪ್ಪು ಸರ್ ಇಲ್ಲ ಅನ್ನೋ ನೋವು ತುಂಬಾ ಕಾಡ್ತಿದೆ ಎಂದು ಆ ಅಭಿಮಾನಿ ನೋವು ತೋಡಿಕೊಂಡಿದ್ದಾನೆ.