ಸಚಿವ ಸುಧಾಕರ್ – ಸಂಸದ ಗೋವಿಂದ ಕಾರಜೋಳ ನಡುವೆ ಮಾತಿನ ಚಕಮಕಿ..!

ಸುದ್ದಿಒನ್, ಚಿತ್ರದುರ್ಗ, ಜನವರಿ. 26 : ಭದ್ರಾ ಮೇಲ್ದಂಡೆ ವಿಚಾರಕ್ಕೆ ಸಂಬಂಧಿಸಿದಂತೆ ಸಚಿವ ಡಿ.ಸುಧಾಕರ್ ಹಾಗೂ ಬಿಜೆಪಿ ಸಂಸದ ಗೋವಿಂದ ಕಾರಜೋಳ ಮಧ್ಯೆ ಮಾತಿನ ಚಕಮಕಿ ನಡೆದಿದೆ.

ಇಂದು 76ನೇ ಗಣರಾಜ್ಯೋತ್ಸವ ದಿನಾಚರಣೆ ಅಂಗವಾಗಿ ನಗರದ ಸರ್ಕಾರಿ ವಿಜ್ಞಾನ ಕಾಲೇಜು ಪಕ್ಕದ ಮುರುಘರಾಜೇಂದ್ರ ಕ್ರೀಡಾಂಗಣದಲ್ಲಿ ನಡೆದ ವೇದಿಕೆ ಕಾರ್ಯಕ್ರಮದಲ್ಲಿ ಇಬ್ಬರ ನಡುವೆ ಮಾತಿನ ಜಟಾಪಟಿ ನಡೆದಿರುವ ಘಟನೆ ನಡೆಯಿತು.

ಈ ವೇಳೆ ಗೋವಿಂದ ಕಾರಜೋಳ ಅವರು ಮಾಧ್ಯಮದವರನ್ನ ಕರೀರಿ ಅವರ ಮುಂದೆಯೇ ಸತ್ಯ ಹೇಳ್ತೀನಿ ಎಂದಿದ್ದಾರೆ. ನಾನು ನೀರಾವರಿ ಮಂತ್ರಿ ಆಗಿದ್ದಾಗ 5700 ಕೋಟಿ ನೀರಾವರಿಗೆ ಕೊಟ್ಟಿದ್ದೀನಿ. ಎರಡನೇ ವರ್ಷದಲ್ಲಿ 5700 ಕೋಟಿ ಕೊಟ್ಟಿದ್ದೀವಿ. ಮೊದಲನೇ ವರ್ಷ 3,300 ಕೋಟಿ, ಎರಡನೇ ವರ್ಷ 2,400 ಕೋಟಿ ಕೊಟ್ಟಿದೀವಿ. ಸಿದ್ದರಾಮಯ್ಯ ಸರ್ಕಾರ ಬಂದ್ಮೇಲೆ ಏನು ಕೊಟ್ಟಿಲ್ಲ ಎಂದಿದ್ದಾರೆ.

ಸುಧಾಕರ್ ಕೂಡ ಈ ವಿಚಾರವಾಗಿ ಮಾತನಾಡಿದ್ದು, ಮೊದಲು ನೀವು 5300 ಕೋಟಿ ಕೇಂದ್ರದಿಂದ ತನ್ನಿ. ಕೇಂದ್ರ ಬಜೆಟ್ ನಲ್ಲಿ ಕೊಟ್ಟ ಮಾತಿನಂತೆ ಮೊದಲು ನಡೆದುಕೊಳ್ಳಿ ಎಂದರು. ಆಗ ಕಾರಜೋಳ ಅವರು, 2007-8 ರಲ್ಲಿ ಭದ್ರಾ ಪ್ರಾಜೆಕ್ಟ್ ಶುರುವಾಗಿದೆ ಎಂದರು. ತಕ್ಷಣ ಸಚಿವ ಸುಧಾಕರ್, ನಾವೇ ಶುರು ಮಾಡಿದ್ದು ನಾನೇ ಇದ್ನಲ್ಲ ಎಂದರು.

ನೀನು ನನ್ನ ಜೊತೇಲೆ ಇದ್ದೆ ಅದಕ್ಕೆ ಹೇಳ್ತಿದೀನಿ ಕೇಳಿಲ್ಲಿ ಎಂದ ಕಾರಜೋಳರಿಗೆ 5300 ಕೋಟಿ ತರೋವರೆಗೂ ಬೇರೆ ಮಾತುಗಳು ಅಪ್ರಸ್ತುತ ಎಂದ ಸಚಿವ ಸುಧಾಕರ್.

ನಾನು 5700 ಕೋಟಿ ಕೊಟ್ಟಿದೀನಿ ನೀನು 5000 ಕೋಟಿ ತಗೊಂಡ್ ಬಾ ಎಂದ ಕಾರಜೋಳ ಅವರಿಗೆ ನೀವೆ ದುಡ್ಡೇ ಇಟ್ಟಿಲ್ಲ ಸರ್ ಎಂದರು ಸುಧಾಕರ್. ಆಗ ಏ ನಿನ್ನ ಮರ್ಯಾದೆ ತೆಗಿತೀನಿ ನಾನು ಗೊತ್ತಿರಲಿ ಎಂದೇಳಿ ಕಾರಜೋಳ ಅವರು ತೆರಳಿದರು.