ವಿಶ್ವ ಆಹಾರ ಸುರಕ್ಷತೆ ದಿನ 2026: ಅಡುಗೆ ಮನೆಯಿಂದ ಊಟದ ತಟ್ಟೆಯವರೆಗೆ… ಆಹಾರ ಸುರಕ್ಷತೆಗಾಗಿ ಈ 5 ನಿಯಮಗಳು ನೆನಪಿರಲಿ!

ಪ್ರತಿ ವರ್ಷ ಜೂನ್ 7 ರಂದು ವಿಶ್ವ ಆಹಾರ ಸುರಕ್ಷತೆ ದಿನವನ್ನು (World Food Safety Day) ಆಚರಿಸಲಾಗುತ್ತದೆ. ಕಲುಷಿತ ಆಹಾರ ಸೇವನೆಯಿಂದ ಬರುವ ಕಾಯಿಲೆಗಳ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುವುದು ಮತ್ತು ಸುರಕ್ಷಿತ ಆಹಾರ ಪದ್ಧತಿಯನ್ನು ಉತ್ತೇಜಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ. ಹೊಲದಿಂದ ಹಿಡಿದು ನಮ್ಮ ಊಟದ ತಟ್ಟೆಯವರೆಗೆ ತಲುಪುವ ಆಹಾರವು ಗುಣಮಟ್ಟದಿಂದ ಕೂಡಿರಬೇಕು ಹಾಗೂ ಸ್ವಚ್ಛತೆಯೇ ಇದಕ್ಕೆ ಮೊದಲ ಆದ್ಯತೆಯಾಗಿರಬೇಕು. ತರಕಾರಿ ಹೆಚ್ಚುವುದರಿಂದ ಹಿಡಿದು ಊಟ ಮಾಡುವವರೆಗೆ ನಾವು ಮನೆಯಲ್ಲಿ ಯಾವೆಲ್ಲಾ ಸುರಕ್ಷತಾ ನಿಯಮಗಳನ್ನು ಪಾಲಿಸಬೇಕು ಎಂಬ ಮಾಹಿತಿ ಇಲ್ಲಿದೆ.

ಇತ್ತೀಚೆಗೆ ವಿಶ್ವ ಆರೋಗ್ಯ ಸಂಸ್ಥೆ (WHO) ಬಿಡುಗಡೆ ಮಾಡಿದ ವರದಿಯ ಪ್ರಕಾರ, ಕಲುಷಿತ ಆಹಾರದ ಸೇವನೆಯಿಂದಾಗಿ ಪ್ರತಿ ವರ್ಷ ಜಗತ್ತಿನಾದ್ಯಂತ ಸುಮಾರು 86 ಕೋಟಿ ಜನರು ಅನಾರೋಗ್ಯಕ್ಕೆ ಒಳಗಾಗುತ್ತಿದ್ದಾರೆ ಮತ್ತು ಪರಿಸ್ಥಿತಿ ಗಂಭೀರವಾಗಿ ಸುಮಾರು 15 ಲಕ್ಷ ಜನರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಮಾರುಕಟ್ಟೆಯಲ್ಲಿ ಕಲಬೆರಕೆ, ರಾಸಾಯನಿಕ ಮತ್ತು ಬ್ಯಾಕ್ಟೀರಿಯಾಗಳಿಂದ ಕೂಡಿದ ಆಹಾರ ಸಿಗುತ್ತಿರುವುದರ ವಿರುದ್ಧ ಆಹಾರ ಸುರಕ್ಷತಾ ಸಂಸ್ಥೆಗಳು ನಿರಂತರವಾಗಿ ಕಾರ್ಯಾಚರಣೆ ನಡೆಸುತ್ತಿರುತ್ತವೆ. ಆದರೆ, ಇದರೊಂದಿಗೆ ನಾವೂ ಕೂಡ ಜಾಗೃತರಾಗಬೇಕಿದೆ.

ಮನೆಯಲ್ಲೇ ಆಹಾರ ಸುರಕ್ಷತೆ ಕಾಯ್ದುಕೊಳ್ಳಲು ನೆರವಾಗುವ ಆ 5 ಮುಖ್ಯ ನಿಯಮಗಳು ಹೀಗಿವೆ:

1. ಕೈ ತೊಳೆಯುವ ಸರಿಯಾದ ವಿಧಾನ ಪಾಲಿಸಿ
ಮನೆಯಲ್ಲಿ ದೊಡ್ಡವರಿಂದ ಹಿಡಿದು ಸಣ್ಣ ಮಕ್ಕಳವರೆಗೆ ಪ್ರತಿಯೊಬ್ಬರಿಗೂ ಆಹಾರವನ್ನು ಮುಟ್ಟುವ ಮುನ್ನ ಕೈ ತೊಳೆಯುವ ಅಭ್ಯಾಸವಿರಬೇಕು. ನಾವರಿಯದೇ ಅಡುಗೆ ಪದಾರ್ಥಗಳನ್ನು ಕೈಯಿಂದ ಮುಟ್ಟಿದಾಗ, ಕೈಯಲ್ಲಿರುವ ಬ್ಯಾಕ್ಟೀರಿಯಾಗಳು ಆಹಾರದ ಮೂಲಕ ದೇಹ ಸೇರುತ್ತವೆ. ಆದ್ದರಿಂದ ಅಡುಗೆ ಮಾಡುವ ಮುನ್ನ, ತರಕಾರಿ ಹೆಚ್ಚುವ ಮುನ್ನ ಮತ್ತು ಊಟಕ್ಕೆ ಕುಳಿತುಕೊಳ್ಳುವ ಮೊದಲು ಕನಿಷ್ಠ 40 ರಿಂದ 60 ಸೆಕೆಂಡುಗಳ ಕಾಲ ಸೋಪಿನಿಂದ ಕೈಗಳನ್ನು ಚೆನ್ನಾಗಿ ಉಜ್ಜಿ ತೊಳೆಯಬೇಕು.

2. ಹಣ್ಣು ಮತ್ತು ತರಕಾರಿಗಳ ಸ್ವಚ್ಛತೆ
ಮಾರುಕಟ್ಟೆಯಿಂದ ತರುವ ಹಣ್ಣು ಮತ್ತು ತರಕಾರಿಗಳಲ್ಲಿ ಕೀಟನಾಶಕ ರಾಸಾಯನಿಕಗಳು ಇರಬಹುದು ಹಾಗೂ ಅವು ಹಲವು ಕೈಗಳನ್ನು ದಾಟಿ ಬರುವುದರಿಂದ ಬ್ಯಾಕ್ಟೀರಿಯಾಗಳನ್ನು ಹೊಂದಿರುತ್ತವೆ. ಕೇವಲ ನೀರಿನಿಂದ ತೊಳೆದರೆ ಇವು ಸ್ವಚ್ಛವಾಗುವುದಿಲ್ಲ. ಆದ್ದರಿಂದ ಒಂದು ಪಾತ್ರೆಯ ನೀರಿಗೆ ಸ್ವಲ್ಪ ವಿನೆಗರ್ ಅಥವಾ ಅಡುಗೆ ಸೋಡಾ (Baking Soda) ಹಾಕಿ, ಅದರಲ್ಲಿ ಹಣ್ಣು-ತರಕಾರಿಗಳನ್ನು ಸ್ವಲ್ಪ ಸಮಯ ನೆನೆಸಿಟ್ಟು, ನಂತರ ಶುದ್ಧ ನೀರಿನಿಂದ ತೊಳೆದು ಬಳಸುವುದು ಒಳ್ಳೆಯದು.

3. ಆಹಾರ ಸಂಗ್ರಹಣೆಯ ಸರಿಯಾದ ವಿಧಾನ
ಹಸಿ ತರಕಾರಿ ಇರಲಿ ಅಥವಾ ಬೇಯಿಸಿದ ಆಹಾರವಿರಲಿ, ಅವುಗಳನ್ನು ಕೀಟಗಳು ಮತ್ತು ಬ್ಯಾಕ್ಟೀರಿಯಾಗಳಿಂದ ರಕ್ಷಿಸುವುದು ಮುಖ್ಯ. ಆಹಾರ ಪದಾರ್ಥಗಳನ್ನು ಯಾವಾಗಲೂ ಚೆನ್ನಾಗಿ ಮುಚ್ಚಿಡಬೇಕು. ಹಣ್ಣು-ತರಕಾರಿಗಳನ್ನು ಇಡಲು ಏರ್‌ಟೈಟ್ ಕಂಟೇನರ್ ಅಥವಾ ಕ್ಲಿಂಗ್ ಫಿಲ್ಮ್ (Cling Film) ಬಳಸಿ. ಬ್ಯಾಕ್ಟೀರಿಯಾಗಳು ಬೆಳೆಯದಂತೆ ತಡೆಯಲು ಆಹಾರವನ್ನು ಸೂಕ್ತವಾದ ತಂಪಾದ ತಾಪಮಾನದಲ್ಲಿ (ರೆಫ್ರಿಜರೇಟರ್‌ನಲ್ಲಿ) ಸಂಗ್ರಹಿಸಿ.

4. ಕಿಚನ್ ಉಪಕರಣಗಳ ಕ್ಲೀನಿಂಗ್
ಅಡುಗೆ ಮಾಡಿದ ನಂತರ ಕೇವಲ ಪಾತ್ರೆಗಳನ್ನು ತೊಳೆದರೆ ಸಾಲದು. ಅಡುಗೆ ಮನೆಯ ಕೌಂಟರ್ ಟಾಪ್, ಚಾಕು, ಚಾಪಿಂಗ್ ಬೋರ್ಡ್‌ಗಳಂತಹ ದಿನನಿತ್ಯ ಬಳಸುವ ವಸ್ತುಗಳನ್ನು ಪ್ರತಿ ಬಳಕೆಯ ನಂತರವೂ ಸ್ವಚ್ಛಗೊಳಿಸಿ ಸ್ಯಾನಿಟೈಸ್ ಮಾಡಬೇಕು. ಇಲ್ಲದಿದ್ದರೆ ಇವುಗಳಲ್ಲಿ ಬ್ಯಾಕ್ಟೀರಿಯಾಗಳು ವೃದ್ಧಿಯಾಗಿ ಆಹಾರದ ಮೂಲಕ ದೇಹ ಸೇರಿ ಅನಾರೋಗ್ಯಕ್ಕೆ ಕಾರಣವಾಗುತ್ತವೆ.

5. ಆಹಾರವನ್ನು ಸರಿಯಾಗಿ ಬೇಯಿಸಿ
ಮೊconvertೊಳಕೆ ಕಾಳುಗಳು (Sprouts), ಮಾಂಸ, ಮೀನು ಮತ್ತು ಮೊಟ್ಟೆಯಂತಹ ಪದಾರ್ಥಗಳನ್ನು ಕೇವಲ ತೊಳೆಯುವುದರಿಂದ ಅವುಗಳಲ್ಲಿರುವ ಹಾನಿಕಾರಕ ಬ್ಯಾಕ್ಟೀರಿಯಾಗಳು ನಾಶವಾಗುವುದಿಲ್ಲ. ಇಂತಹ ಆಹಾರಗಳನ್ನು ಸರಿಯಾದ ತಾಪಮಾನದಲ್ಲಿ, ಸಂಪೂರ್ಣವಾಗಿ ಬೇಯಿಸಿ ತಿನ್ನುವುದರಿಂದ ಮಾತ್ರ ಬ್ಯಾಕ್ಟೀರಿಯಾ ಮತ್ತು ವೈರಸ್‌ಗಳನ್ನು ನಾಶಪಡಿಸಲು ಸಾಧ್ಯ.