Watch : ಇಂಡೋನೇಷ್ಯಾದ ಭವ್ಯ ಪ್ರಂಬನನ್ ದೇವಾಲಯದ ಅದ್ಭುತ ವೈಮಾನಿಕ ವಿಡಿಯೋ ಹಂಚಿಕೊಂಡ ಪ್ರಧಾನಿ ಮೋದಿ

ಜಕಾರ್ತ: ಇಂಡೋನೇಷ್ಯಾ ಪ್ರವಾಸದಲ್ಲಿರುವ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಬುಧವಾರ ಅಲ್ಲಿನ ಐತಿಹಾಸಿಕ ಮತ್ತು ಪ್ರಸಿದ್ಧ ‘ಪ್ರಂಬನನ್’ (Prambanan) ಹಿಂದೂ ದೇವಾಲಯದ ಅತ್ಯದ್ಭುತ ವೈಮಾನಿಕ ದೃಶ್ಯದ (Aerial View) ವೀಡಿಯೊವನ್ನು ಹಂಚಿಕೊಂಡಿದ್ದಾರೆ. ಇಂಡೋನೇಷ್ಯಾ ಅಧ್ಯಕ್ಷ ಪ್ರಬೋವೊ ಸುಬಿಯಾಂತೊ ಅವರೊಂದಿಗೆ ಹೆಲಿಕಾಪ್ಟರ್‌ನಲ್ಲಿ ಯುನೆಸ್ಕೋ ವಿಶ್ವ ಪರಂಪರೆಯ ತಾಣಕ್ಕೆ ತೆರಳುವಾಗ ಪ್ರಧಾನಿ ಈ ವೀಡಿಯೊವನ್ನು ಚಿತ್ರೀಕರಿಸಿದ್ದಾರೆ.

ತಮ್ಮ ಅಧಿಕೃತ ‘ಎಕ್ಸ್’ (ಟ್ವಿಟರ್) ಖಾತೆಯಲ್ಲಿ ಈ ವೀಡಿಯೊವನ್ನು ಹಂಚಿಕೊಂಡಿರುವ ಪ್ರಧಾನಿ ಮೋದಿ, ಶತಮಾನಗಳಷ್ಟು ಹಳೆಯದಾದ ಈ ಭವ್ಯ ಹಿಂದೂ ಸ್ಮಾರಕವನ್ನು ‘ಮೆಜೆಸ್ಟಿಕ್’ (ಭವ್ಯ) ಎಂದು ಬಣ್ಣಿಸಿದ್ದಾರೆ. ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ಸಾಂಸ್ಕೃತಿಕ ರಾಜತಾಂತ್ರಿಕತೆಯ ಭಾಗವಾಗಿ, ಭಾರತದ ಬೆಂಬಲದೊಂದಿಗೆ ಈ ದೇವಾಲಯದ ಸಂರಕ್ಷಣೆ ಮತ್ತು ಜಿರ್ಣೋದ್ಧಾರ ಯೋಜನೆಯನ್ನು ಹಮ್ಮಿಕೊಳ್ಳಲಾಗುತ್ತಿದ್ದು, ಇದರ ಅಧಿಕೃತ ಚಾಲನೆಗೂ ಮುನ್ನ ಪ್ರಧಾನಿ ಈ ಭೇಟಿ ನೀಡಿದ್ದಾರೆ.

ಒಂದು ದಿನದ ಹಿಂದಷ್ಟೇ ಪ್ರಧಾನಿ ಮೋದಿ ಮತ್ತು ಅಧ್ಯಕ್ಷ ಪ್ರಬೋವೊ ನಡುವೆ ನಡೆದ ದ್ವಿಪಕ್ಷೀಯ ಮಾತುಕತೆಯ ನಂತರ, ಉಭಯ ದೇಶಗಳ ಸಮಗ್ರ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಈ ಪರಂಪರೆ ಸಂರಕ್ಷಣೆಯ ಒಪ್ಪಂದ ಪತ್ರಕ್ಕೆ ಸಹಿ ಹಾಕಲಾಗಿತ್ತು.

The majestic Prambanan Temple! pic.twitter.com/pRS2S9X5gm

— Narendra Modi (@narendramodi) July 8, 2026

ಪ್ರಂಬನನ್ ದೇವಾಲಯದ ಹಿನ್ನೆಲೆ
ಇಂಡೋನೇಷ್ಯಾದ ಜಾವಾ ದ್ವೀಪದಲ್ಲಿರುವ ಪ್ರಂಬನನ್ ದೇವಾಲಯ ಸಂಕೀರ್ಣವು ಆ ದೇಶದ ಅತಿ ದೊಡ್ಡ ಮತ್ತು ಆಗ್ನೇಯ ಏಷ್ಯಾದಲ್ಲೇ (ಕಾಂಬೋಡಿಯಾದ ಆಂಗ್ಕೋರ್ ವಾಟ್ ನಂತರ) ಎರಡನೇ ಅತಿ ದೊಡ್ಡ ಹಿಂದೂ ದೇವಾಲಯವಾಗಿದೆ. 9ನೇ ಶತಮಾನದಲ್ಲಿ ಹಿಂದೂ ಮಾತಾರಾಮ್ ರಾಜವಂಶದ ರಾಜ ರಾಕೈ ಪಿಕಾತನ್ ಅವರಿಂದ ಈ ಬೃಹತ್ ನಿರ್ಮಾಣ ಕಾರ್ಯ ಆರಂಭಗೊಂಡು, ಅವರ ಉತ್ತರಾಧಿಕಾರಿ ಲೋಕಪಾಲ ಅವರ ಅವಧಿಯಲ್ಲಿ ಪೂರ್ಣಗೊಂಡಿತು ಎಂದು ಇತಿಹಾಸ ಹೇಳುತ್ತದೆ.

ಹಿಂದೂ ತ್ರಿಮೂರ್ತಿಗಳಾದ ಶಿವ, ವಿಷ್ಣು ಮತ್ತು ಬ್ರಹ್ಮನಿಗೆ ಸಮರ್ಪಿತವಾಗಿರುವ ಈ ಸಂಕೀರ್ಣವು ಭವ್ಯವಾದ ರಾಮಾಯಣದ ಕೆತ್ತನೆಗಳಿಗೆ ಪ್ರಸಿದ್ಧಿಯಾಗಿದೆ. ಸುಮಾರು 40 ಹೆಕ್ಟೇರ್‌ಗಳಷ್ಟು ವಿಸ್ತಾರವಾಗಿರುವ ಈ ಪ್ರಾಚೀನ ಆವರಣವು ಮೂಲತಃ ಸುಮಾರು 240 ದೇವಾಲಯಗಳನ್ನು ಹೊಂದಿತ್ತು. ಜ್ವಾಲಾಮುಖಿ ಶಿಲೆಯಿಂದ ನಿರ್ಮಿಸಲಾದ ಇಲ್ಲಿನ ಕೇಂದ್ರ ಶಿವ ದೇವಾಲಯವು ಸುಮಾರು 47 ಮೀಟರ್ ಎತ್ತರವಿದ್ದು, ಶಾಸ್ತ್ರೀಯ ಹಿಂದೂ ವಾಸ್ತುಶಿಲ್ಪದ ವೈಭವವನ್ನು ಪ್ರದರ್ಶಿಸುತ್ತದೆ. ಭಾರತ ಮತ್ತು ಆಗ್ನೇಯ ಏಷ್ಯಾ ನಡುವಿನ ಪುರಾತನ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಬಾಂಧವ್ಯಕ್ಕೆ ಸಾಕ್ಷಿಯಾಗಿರುವ ಈ ದೇವಾಲಯವನ್ನು ಯುನೆಸ್ಕೋ 1991 ರಲ್ಲಿ ವಿಶ್ವ ಪರಂಪರೆಯ ತಾಣವೆಂದು ಘೋಷಿಸಿದೆ.