ಜಗದ್ಗುರು ಶ್ರೀ ಶಂಕರಾಚಾರ್ಯ ಜಯಂತಿ ನಿಮಿತ್ತ ವಿಶೇಷ ಕವನ : ಶ್ರೀಮತಿ ಸುಜಾತ ಪ್ರಾಣೇಶ್

 

ವಂದಿಸುವೆ ನಿಮಗೆ ಶ್ರೀ ಶಂಕರಾಚಾರ್ಯ
ಅದ್ವೈತವ ಸ್ಥಾಪಿಸಿದ ಗುರುವರೇಣ್ಯ
ಭುವಿಯಲಿ ಅವತರಿಸಿದ ಶಿವ ಸ್ವರೂಪ
ಆದಿರಿ ಮನುಜ ಕುಲಕೆ ದಾರಿದೀಪ

ಕನಕಧಾರ ಸ್ತುತಿಸಿ ಬಡವಿಯನ್ನುದ್ಧರಿಸಿದಿರಿ
ಲಲಿತ ಪಂಚಕ ರಚಿಸಿ ದೇವಿಯ ಸ್ಮರಿಸಿದಿರಿ
ಗಣೇಶಪಂಚಕ ರಚಿಸಿ ಪ್ರಾರ್ಥನೆಗೈದಿರಿ
ಬ್ರಹ್ಮಸೂತ್ರ ಭಾಷ್ಯ ಬರೆದು ದಿಗ್ಗಜರೆನಿಸಿದಿರಿ

ಸೌಂದರ್ಯ ಲಹರಿ ನಿಮ್ಮಪಾಂಡಿತ್ಯದ ಹಿರಿಮೆ
ಶಿವಾನಂದಲಹರಿ ನಿಮ್ಮಜ್ಞಾನದ ಗರಿಮೆ
ಶಿಷ್ಯರಿಗೆ ತೋರಿದಿರಿ ನಿಮ್ಮ ಪ್ರೌಢಿಮೆ
ಶಕ್ತಿ ಪೀಠಗಳ ಸ್ಥಾಪನೆ ನಿಮ್ಮ ಮಹಿಮೆ

ವಿವೇಕ ಚೂಡಾಮಣಿ ಜ್ಞಾನವ ಬೆಳಗಿತು
ಅಷ್ಠಲಕ್ಷ್ಮಿ ಸ್ತೋತ್ರ ಬಡತನ ನೀಗಿಸಿತು
ಭಜ ಗೋವಿಂದಂ ಭವದ ಮೋಹ ಬಿಡಿಸಿತು
ಅನ್ನಪೂರ್ಣೆ ಸ್ತುತಿಯಿಂದ ಹಸಿವು ನೀಗಿತು

ಭಾರತದುದ್ದಗಲಕ್ಕೂ ನಿಮ್ಮ ಪಯಣ
ಮನುಕುಲಕೆ ದೊರಕಿತು ಪಾಂಡಿತ್ಯದ ಹೂರಣ
ಅಲ್ಪಾಯುಷ್ಯದಲ್ಲಿ ಅಗಾಧ ಪಾಂಡಿತ್ಯ
ಕೇದಾರನಾಥದಲ್ಲಿ ಅಂತಿಮ ಕೈವಲ್ಯ

ನಿಮ್ಮ ಕೃತಿಗಳೇ ಬಾಳಿಗೆ ಸೋಫಾನ
ಮಾರ್ಗದರ್ಶನದಿಂದ ಜೀವನ ಪಾವನ
ಯತಿವರ್ಯರೇ ಬಿಡಿಸಿದಿರಿ ಭವಬಂಧನ
ಜಗದ್ಗುರುವೇ ನಿಮಗೆ ಕೋಟಿ ನಮನ

ಕವಯಿತ್ರಿ : ಶ್ರೀಮತಿ ಸುಜಾತ ಪ್ರಾಣೇಶ್, ಚಿತ್ರದುರ್ಗ,

99861 53163