ಬೇವಿನ ಮರದ ಕೆಳಗೆ ಕೂತು ಟೀಕೆ ಮಾಡೋದಲ್ಲ : ಸಹೋದರರಿಗೆ ಸಲಹೆ ಕೊಟ್ಟ ಸತೀಶ್ ಜಾರಕಿಹೊಳಿ

ಬೆಳಗಾವಿ: ವಿಧಾನ ಪರಿಷತ್ ಚುನಾವಣೆಯಲ್ಲಿ ಬೆಳಗಾವಿಯಿಂದ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಲಖನ್ ಜಾರಕಿಹೊಳಿಗೂ ಗೆಲುವಾಗಿದೆ. ಈ ಸಂಬಂಧ ಮಾಧ್ಯಮದವರೊಂದಿಗೆ ಮಾತನಾಡಿರುವ ಕೆಪಿಸಿಸಿ ಕಾರ್ಯಾಧ್ಯಕ್ಷ ಸತೀಶ್ ಜಾರಕಿಹೊಳಿ, ಸಹೋದರರ ನಡವಳಿಕೆ ಬದಲಾಯಿಸಿಕೊಳ್ಳಲು ಸಲಹೆ ನೀಡಿದ್ದಾರೆ.

ಬಿಜೆಪಿ ಯಡವಟ್ಟಿನಿಂದಾಗಿ ಲಖನ್ ಜಾರಕಿಹೊಳಿ ಗೆಲಯವಾಗಿದೆ. ಇದು ಅವರಿಗೆ ಬಯಸದೆ ಬಂದ ಭಾಗ್ಯ. ಅದನ್ನ ಸರಿಯಾಗಿ ಉಪಯೋಗಿಸಿಕೊಳ್ಳಬೇಕಾಗಿದೆ. ಲಖನ್ ಹಾಗೂ ರಮೇಶ್ ತಮ್ಮ ನಡವಳಿಕೆಯನ್ನ ಬದಲಾಯಿಸಿಕೊಳ್ಳಬೇಕಾಗಿದೆ. ಬಯಸದೆ ಬಂದಿರುವ ಗೆಲುವಿದು. ಸರಿಯಾಗಿ ಉಪಯೋಗಿಸಿಕೊಳ್ಳಬೇಕು.

ಬೇವಿನ ಮರದ ಕೆಳಗೆ ಜನರನ್ನ ಟೀಕೆ ಮಾಡುತ್ತಾ ಕೂತರೆ ಜನ ಚುನಾವಣೆ ಯಾವಾಗ ಬರುತ್ತೆ ಅಂತ ಕಾದು ಕುಳಿತಿರುತ್ತಾರೆ. ಸಣ್ಣ ಸಣ್ಣವರ ನಡುವೆ ತಂದಿಟ್ಟ ಹಾಗೇ ದೊಡ್ಡ ದೊಡ್ಡವರ ನಡುವೆ ಆ ಕೆಲಸ ಮಾಡಿದ್ರೆ ಅನಾಹುತವಾಗೋದು ಗ್ಯಾರಂಟಿ. ಹೀಗಾಗಿ ಎಚ್ಚರದಿಂದ ಮಾತಾಡಬೇಕು ಎಂದು ಸಲಹೆ ನೀಡಿದ್ದಾರೆ.