ನವದೆಹಲಿ :ಜನಪ್ರತಿನಿಧಿಗಳೇ ಕೊಂಚ ಬಿಡುವು ಮಾಡಿಕೊಂಡು ಈ ಸುದ್ದಿ ಓದಿ..ಇದು ನಿಮ್ಮ ಆರೋಗ್ಯದ ವಿಷಯ. ನಿರ್ಲಕ್ಷಿಸಿದರೆ ಅಪಾಯ ಖಚಿತ.
ರಾಜಕಾರಣಿಗಳಿಗೆ ನಿತ್ಯ ನೂರಾರೂ ಪತ್ರಗಳು ಬರುತ್ತವೆ. ಇವುಗಳನ್ನು ಒಮ್ಮೆಯಾದರು ನೋಡುತ್ತೀರಾ. ಈ ಪತ್ರಗಳೇ ಈಗ ಕೊರೊನಾ ಹರಡುತ್ತಿವೆ ಎನ್ನುತ್ತಿದೆ ಜಾಗತಿಕ ಪೊಲೀಸ್ ಸಂಘಟನೆಯಾಗಿರುವ ಇಂಟರ್ಪೋಲ್.
ಭಾರತ ಸೇರಿದಂತೆ 194 ಸದಸ್ಯ ರಾಷ್ಟ್ರಗಳಿಗೆ ಫ್ರಾನ್ಸ್‍ನ ಲಿಯೋನ್‍ನಲ್ಲಿರುವ ಜಾಗತಿಕ ಪೊಲೀಸ್ ಸಂಘಟನೆಯಾಗಿರುವ ಇಂಟರ್ಪೋಲ್ ( ಇಂಟರ್ ನ್ಯಾಷಿನಲ್ ಕ್ರಿಮಿನಲ್ ಪೊಲೀಸ್ ಕಮಿಷನ್) ಇಂತಹದೊಂದು ಎಚ್ಚರಿಕೆ ಸಂದೇಶ ರವಾನಿಸಿದೆ. ಈ ಸಂದೇಶ ತೀವ್ರ ಆತಂಕ ಸೃಷ್ಟಿಸಿದೆ.
ಕೊರೋನಾ ಸೋಂಕು ಒಳಗೊಂಡ ಪತ್ರ ರಾಜಕಾರಣಿಗಳು ಹಾಗೂ ಇನ್ನಿತರೆ ವ್ಯಕ್ತಿಗಳಿಗೆ ರವಾನೆಯಾಗಬಹುದು. ರಾಜಕಾರಣಿಗಳ ಮೇಲೆ ದಾಳಿ ಮಾಡುವ ಉದ್ದೇಶದಿಂದಲೇ ಇಂತಹ ಕೃತ್ಯ ನಡೆಯಬಹುದು. ಈಗಾಗಲೇ ಉದ್ದೇಶಪೂರ್ವಕವಾಗಿ ನಿರ್ದಿಷ್ಟಸ್ಥಳಗಳಲ್ಲಿ ಉಗುಳುವ, ಕೆಮ್ಮುವ ಘಟನೆಗಳು ವರದಿಯಾಗಿವೆ. ಜೊತೆಗೆ ಆನ್ಲೈನ್ನಲ್ಲೇ ಸೋಂಕಿತರ ದೇಹ ದ್ರವ ಮಾರಾಟಕ್ಕಿರುವುದಾಗಿ ಹೇಳಿರುವ ಪ್ರಕರಣ ಕೂಡಾ ಬೆಳಕಿಗೆ ಬಂದಿದೆ ಎಂದು ಇಂಟರ್ಪೋಲ್ ತಿಳಿಸಿದೆ.
ಆದರೆ ಪತ್ರ ಬರೆದು ಕೊರೋನಾ ಹಬ್ಬಿಸುವ ಯಾವುದಾದರೂ ಪ್ರಕರಣ ಜಗತ್ತಿನಲ್ಲಿ ನಡೆದಿದೆಯೇ ಎಂಬ ಬಗ್ಗೆ ಯಾವುದೇ ನಿದರ್ಶನವನ್ನು ಪ್ರಸ್ತಾಪಿಸಿಲ್ಲ. ಈ ರೀತಿಯ ಕೃತ್ಯಗಳನ್ನು ಯಾರು ಮಾಡಬಹುದು ಎಂಬ ಬಗ್ಗೆಯೂ ಉಲ್ಲೇಖಿಸಿಲ್ಲ ಎಂದು ವರದಿಗಳು ತಿಳಿಸಿವೆ.
ಕೋವಿಡ್ ಸಂಕಷ್ಟದಲ್ಲಿ ರಾಜಕಾರಣಿಗಳು ಹಾಗೂ ಗಣ್ಯ ವ್ಯಕ್ತಿಗಳ ಭದ್ರತೆಗೆ ನಿಯೋಜನೆಗೊಂಡಿರುವ ವ್ಯಕ್ತಿಗಳು ಇಂತಹ ಅಪಾಯಗಳನ್ನು ಅರಿತುಕೊಂಡಿರಬೇಕು. ಯಾವುದಾದರೂ ವ್ಯಕ್ತಿ ಅಸಹಕಾರ ಧೋರಣೆಯಿಂದ ಹತ್ತಿರ ಬಂದರೆ ಹೆಚ್ಚು ಎಚ್ಚರಿಕೆ ವಹಿಸಬೇಕು. ಪಿಪಿಇ ಕಿಟ್ ಧರಿಸಬೇಕು. ಅಂಚೆ ಇಲಾಖೆ ಹಾಗೂ ಕಚೇರಿಗಳಲ್ಲಿ ಪತ್ರ ವಿಲೇವಾರಿ ಮಾಡುವವರಿಗೆ ಶಂಕಾಸ್ಪದ ಪಾರ್ಸೆಲ್ ಗಳು ಅಪಾಯ ತಂದೊಡ್ಡುವ ಸಾಧ್ಯತೆ ಹೆಚ್ಚಿದೆ ಎಂದು ಸಲಹೆ ನೀಡಿದೆ.
ಕಾನೂನು ಜಾರಿ ಅಧಿಕಾರಿಗಳು, ವೈದ್ಯರು ಹಾಗೂ ಅವಶ್ಯ ಸೇವೆ ಸಿಬ್ಬಂದಿಗಳನ್ನು ಬೆದರಿಸಲು ಅವರ ಮೇಲೆ ಉಗುಳಿದ ಮತ್ತು ಕೆಮ್ಮಿದ ಪ್ರಕರಣಗಳನ್ನು ಇಂಟರ್ಪೋಲ್ ಪ್ರಸ್ತಾಪಿಸಿದೆ.
