ಸಮಾಜಮುಖಿ ಕೆಲಸ ಮಾಡಿದಾಗ ಎಲ್ಲರ ನೆನಪಿನಲ್ಲಿ ಉಳಿಯಬಹುದು : ಕೆ.ರವಿಶಂಕರ್ ರೆಡ್ಡಿ

ವರದಿ : ಕೆ.ಎಂ.ಮುತ್ತುಸ್ವಾಮಿ ಕಣ್ಣನ್

ಚಿತ್ರದುರ್ಗ: ಅಧಿಕಾರ, ಅಂತಸ್ತು, ಸಂಪತ್ತು ಸಿಕ್ಕಾಗ ಅಹಂಕಾರ ಪಡುವ ಬದಲು ಸಮಾಜಮುಖಿ ಕೆಲಸ ಮಾಡಿದಾಗ ಎಲ್ಲರ ನೆನಪಿನಲ್ಲಿ ಉಳಿಯಬಹುದು ಎಂದು ಸಾರ್ವಜನಿಕ ಶಿಕ್ಷಣ ಇಲಾಖೆ ಉಪನಿರ್ದೇಶಕ ಕೆ.ರವಿಶಂಕರ್ ರೆಡ್ಡಿ ತಿಳಿಸಿದರು.

ಸಮಗ್ರ ಶಿಕ್ಷಣ ಕರ್ನಾಟಕ, ಮೈಂಡ್‍ಟ್ರಿ ಫೌಂಡೇಷನ್ ಹಾಗೂ ದಿ ಅಸೋಸಿಯೇಷನ್ ಆಫ್ ಪೀಪಲ್ ವಿತ್ ಡಿಸೆಬಲಿಟಿ ಇವರುಗಳ ಸಹಯೋಗದೊಂದಿಗೆ ರೋಟರಿ ಬಾಲಭವನದಲ್ಲಿ ಸೋಮವಾರ ಹಮ್ಮಿಕೊಳ್ಳಲಾಗಿದ್ದ ಜಿಲ್ಲೆಯ ವಿಕಲಚೇತನ ಮಕ್ಕಳಿಗೆ ಸಾಧನ ಸಲಕರಣೆಗಳ ವಿತರಣಾ ಸಮಾರಂಭ ಉದ್ಭಾಟಿಸಿ ಮಾತನಾಡಿದರು.

ಎಲ್ಲಾ ಅಂಗಗಳು ಸರಿಯಾಗಿದ್ದವರಿಗೂ ಅವರದೆ ಆದ ಅಡಚಣೆಗಳಿರುತ್ತವೆ. ಆದರೆ ಹುಟ್ಟಿನಿಂದಲೇ ಅಂಗವಿಕಲರಾದವರನ್ನು ಜೀವನ ಪರ್ಯಂತ ಜೋಪಾನ ಮಾಡುವುದು ಸವಾಲಿನ ಕೆಲಸ. ವಿಶೇಷವಾಗಿ ತಾಯಿಯ ಮೇಲೆ ಹೊಣೆಗಾರಿಕೆ ಜಾಸ್ತಿಯಿದೆ. ಆದ್ದರಿಂದ ಅನುಕಂಪಕ್ಕಿಂತ ವಿಕಲಚೇತನ ಮಕ್ಕಳಿಗೆ ಸಾಧನ ಸಲಕರಣೆಗಳನ್ನು ನೀಡಿ ಸಮಾಜದ ಮುಖ್ಯವಾಹಿನಿಗೆ ತರುವ ನಿಟ್ಟಿನಲ್ಲಿ ಸಮಾಜದ ಪಾತ್ರ ದೊಡ್ಡದು ಎಂದು ಹೇಳಿದರು.

ಮೈಂಡ್‍ಟ್ರೀ ಫೌಂಡೇಷನ್ ಹಾಗೂ ಎಪಿಡಿ ಇವರುಗಳ ಜೊತೆ ಚರ್ಚಿಸಿದ್ದರ ಫಲವಾಗಿ ಒಂದು ತಿಂಗಳೊಳಗೆ ಜಿಲ್ಲೆಯ ವಿಕಲಚೇತನ ಮಕ್ಕಳಿಗೆ ಸಾಧನ ಸಲಕರಣೆಗಳನ್ನು ನೀಡಲು ಮುಂದೆ ಬಂದಿರುವುದು ಪುಣ್ಯದ ಕೆಲಸ ಎಂದು ಕೃತಜ್ಞತೆ ಸಲ್ಲಿಸಿದ ಕೆ.ರವಿಶಂಕರ್‍ರೆಡ್ಡಿ ಕೊರೋನಾದಿಂದ ಹದಿನೆಂಟು ತಿಂಗಳುಗಳ ಕಾಲ ಶಾಲೆಗಳು ಬಂದ್ ಆಗಿದ್ದರಿಂದ ಮಕ್ಕಳು ಮನೆಯಲ್ಲಿ ಉಳಿದುಕೊಳ್ಳುವಂತಾಗಿತ್ತು. ಕನ್ನಡ ರಾಜ್ಯೋತ್ಸದಂದು ಪೊಲೀಸ್ ಕವಾಯತು ಮೈದಾನದಲ್ಲಿ ಮಕ್ಕಳು ಕುಣಿದು ಕುಪ್ಪಳಿಸಿದ್ದನ್ನು ನೋಡಿ ಮನಸ್ಸಿಗೆ ಅತೀವ ಸಂತೋಷವಾಯಿತು ಎಂದರು.

ಸಾರ್ವಜನಿಕ ಶಿಕ್ಷಣ ಇಲಾಖೆ ಡಯಟ್‍ನ ಉಪನಿರ್ದೇಶಕ ಎಸ್.ಕೆ.ಬಿ.ಪ್ರಸಾದ್ ಮಾತನಾಡುತ್ತ ಜಿಲ್ಲೆಯಲ್ಲಿರುವ ವಿಕಲಚೇತನ ಮಕ್ಕಳನ್ನು ಗುರುತಿಸಿ ಸಾಧನ ಸಲಕರಣೆಗಳನ್ನು ನೀಡುವುದಕ್ಕಿಂತ ಅದನ್ನು ಹೇಗೆ ಬಳಸಬೇಕೆನ್ನುವುದನ್ನು ತಿಳಿಸಬೇಕು. ಆಗ ಮಾತ್ರ ವಿಕಲಚೇತನ ಮಕ್ಕಳ ಜೀವನದಲ್ಲಿ ಬದಲಾವಣೆ ಕಾಣಲು ಸಾಧ್ಯ, ಕೆಲವೊಮ್ಮೆ ಶಾಲೆಗಳಿಗೆ ನೀಡುವ ಸಾಧನ ಸಲಕರಣೆಗಳನ್ನು ಅಂಗವಿಕಲ ಮಕ್ಕಳಿಗೆ ಬಳಸಲು ನೀಡದೆ ಗಾಡ್ರೆಜ್‍ನಲ್ಲಿ ಇಟ್ಟಿರುವುದನ್ನು ಕಂಡಿದ್ದೇನೆ. ಇಂತಹ ಪ್ರಕರಣಗಳು ಮರುಕಳಿಸಬಾರದು ಎಂದು ತಾಕೀತು ಮಾಡಿದರು.

ಮೈಂಡ್‍ಟ್ರೀ ಫೌಂಡೇಶನ್‍ನ ಮಾಣಿಕ್ಯವೇಲು ಎಂ, ಎಪಿಡಿ ಉಪನಿರ್ದೇಶಕ ಜನಾರ್ಧನ್ ಎ.ಎಲ್, ಜಿಲ್ಲಾ ಅಂಗವಿಕಲ ಕಲ್ಯಾಣಾಧಿಕಾರಿ ಶ್ರೀಮತಿ ವೈಶಾಲಿ, ಕ್ಷೇತ್ರ ಶಿಕ್ಷಣಾಧಿಕಾರಿ ಈಶ್ವರಪ್ಪ, ತಿಮ್ಮಾರೆಡ್ಡಿ ವೇದಿಕೆಯಲ್ಲಿದ್ದರು.