ಇಂದಿನ ಡಿಜಿಟಲ್ ಯುಗದಲ್ಲಿ ಚಿಕ್ಕ ಮಕ್ಕಳಿಗೆ ಊಟ ಮಾಡಿಸುವುದೇ ಪೋಷಕರಿಗೆ ದೊಡ್ಡ ಸವಾಲಾಗಿದೆ. ಮೊಬೈಲ್ನಲ್ಲಿ ಕಾರ್ಟೂನ್ ಅಥವಾ ವೀಡಿಯೋ ಹಾಕಿಕೊಡದಿದ್ದರೆ ಮಕ್ಕಳು ಒಂದು ತುತ್ತು ಊಟವನ್ನೂ ಕಷ್ಟ. ಮಗು ಗಲಾಟೆ ಮಾಡದಿರಲಿ ಎಂದು ಆರಂಭದಲ್ಲಿ ಪೋಷಕರೇ ಫೋನ್ ಕೈಗೆ ನೀಡುತ್ತಾರೆ. ಆದರೆ, ಕ್ರಮೇಣ ಇದು ತೀವ್ರ ಹಾನಿಕಾರಕ ‘ಸ್ಕ್ರೀನ್ ಅಡಿಕ್ಷನ್’ (Screen Addiction) ಆಗಿ ಬದಲಾಗುತ್ತದೆ.
ಮಕ್ಕಳಲ್ಲಿ ಈ ಅಭ್ಯಾಸದಿಂದ ಕಣ್ಣಿನ ಸಮಸ್ಯೆ, ಏಕಾಗ್ರತೆಯ ಕೊರತೆ ಹಾಗೂ ದೈಹಿಕ-ಮಾನಸಿಕ ಬೆಳವಣಿಗೆಯಲ್ಲಿ ಕುಂಠಿತದಂತಹ ಗಂಭೀರ ಸಮಸ್ಯೆಗಳು ಎದುರಾಗುತ್ತವೆ. ಮಕ್ಕಳನ್ನು ಗದರಿಸುವುದರಿಂದ ಅಥವಾ ಹೆದರಿಸುವುದರಿಂದ ಈ ಅಭ್ಯಾಸ ಬದಲಾಗುವುದಿಲ್ಲ. ಬದಲಾಗಿ, ಈ 3 ಸರಳ ಹಂತಗಳ ಮೂಲಕ ಅವರ ಮೊಬೈಲ್ ಚಟವನ್ನು ಬಿಡಿಸಬಹುದು:
1. ಸ್ಕ್ರೀನ್ ಟೈಮ್ ಹಂತ-ಹಂತವಾಗಿ ಕಡಿಮೆ ಮಾಡಿ
ಮಕ್ಕಳ ಕೈಯಿಂದ ಒಮ್ಮೆಗೆ ಫೋನ್ ಕಸಿದುಕೊಂಡರೆ ಅವರು ಇನ್ನಷ್ಟು ಹಠಮಾರಿಯಾಗುತ್ತಾರೆ. ಆದ್ದರಿಂದ ದಿನನಿತ್ಯದ ಅಭ್ಯಾಸವನ್ನು ಮೆಲ್ಲನೆ ಬದಲಾಯಿಸಿ. ಆರಂಭದಲ್ಲಿ ಊಟದ ಸಮಯದಲ್ಲಿ ಕೆಲವೇ ನಿಮಿಷ ಫೋನ್ ನೋಡಲು ಬಿಟ್ಟು, ನಂತರ ಪ್ರತಿದಿನ ಆ ಸಮಯವನ್ನು ಕಡಿತಗೊಳಿಸುತ್ತ ಬನ್ನಿ. ಈ ಶಿಸ್ತಿನಿಂದ ಮಕ್ಕಳು ಫೋನ್ ಇಲ್ಲದೆಯೇ ಊಟ ಮಾಡಲು ಕಲಿಯುತ್ತಾರೆ.
2. ಕುಟುಂಬದವರೆಲ್ಲರೂ ಒಟ್ಟಿಗೆ ಕುಳಿತು ಊಟ ಮಾಡಿ
ಮಕ್ಕಳು ಯಾವಾಗಲೂ ಹಿರಿಯರನ್ನು ನೋಡಿಯೇ ಕಲಿಯುತ್ತಾರೆ. ಮನೆಮಂದಿಯೆಲ್ಲರೂ ಮೊಬೈಲ್, ಟಿವಿ ಬದಿಗಿಟ್ಟು ಡೈನಿಂಗ್ ಟೇಬಲ್ ಅಥವಾ ಒಂದೆಡೆ ಕುಳಿತು ಒಟ್ಟಿಗೆ ಊಟ ಮಾಡುವ ಅಭ್ಯಾಸ ಮಾಡಿಕೊಳ್ಳಿ. ಊಟದ ಜಾಗದಲ್ಲಿ ಯಾವುದೇ ಡಿಜಿಟಲ್ ಸಾಧನಗಳನ್ನು ತರಬಾರದು ಎಂಬ ನಿಯಮವಿರಲಿ. ಎಲ್ಲರೂ ಜೊತೆಗಿದ್ದಾಗ ಮಕ್ಕಳು ಸಂತೋಷದಿಂದ ಫೋನ್ ಮರೆತು ಊಟ ಮಾಡುತ್ತಾರೆ.
3. ಕುತೂಹಲಕಾರಿ ಕಥೆಗಳು, ಮಾತುಕತೆ ನಡೆಸಿ
ಊಟದ ಸಮಯದಲ್ಲಿ ಮಗುವಿನ ಗಮನ ಫೋನ್ ಕಡೆಗೆ ಹೋಗದಂತೆ ತಡೆಯಲು ಅವರೊಂದಿಗೆ ಪ್ರೀತಿಯಿಂದ ಮಾತನಾಡಿ. ಶಾಲೆಯಲ್ಲಿ ಏನೇನಾಯಿತು? ಗೆಳೆಯರ ಜೊತೆ ಹೇಗೆ ಸಮಯ ಕಳೆದರು? ಎಂಬುದನ್ನು ಕೇಳಿ ತಿಳಿದುಕೊಳ್ಳಿ. ಚಂದಮಾಮನ ಕಥೆಗಳು ಅಥವಾ ಆಸಕ್ತಿದಾಯಕ ಕಥೆಗಳನ್ನು ಹೇಳುತ್ತಾ ಊಟ ಮಾಡಿಸುವುದರಿಂದ ಅವರ ಗಮನ ಫೋನ್ನಿಂದ ದೂರವಾಗುತ್ತದೆ.
ನೆನಪಿರಲಿ: ಮಕ್ಕಳಿಂದ ಸ್ಮಾರ್ಟ್ಫೋನ್ ಬಿಡಿಸುವುದು ಒಂದೇ ದಿನದಲ್ಲಿ ಆಗುವ ಕೆಲಸವಲ್ಲ. ಇದಕ್ಕೆ ತಾಳ್ಮೆ ಮತ್ತು ಸಮಯ ಅಗತ್ಯ. ಪೋಷಕರಾದ ನೀವೇ ಮೊದಲು ಫೋನ್ ಬಳಕೆಯನ್ನು ಕಡಿಮೆ ಮಾಡಿದರೆ, ಮಕ್ಕಳು ಖಂಡಿತವಾಗಿಯೂ ನಿಮ್ಮನ್ನೇ ಅನುಸರಿಸುತ್ತಾರೆ!
