ಬೆಳಕಿನ ಬೆಲೆ ಸಾರುವ ಹಬ್ಬವಿದು
ಚಿಣ್ಣರು ಚಿಲಿಪಿಲಿಗುಡುವ ಸಮಯವಿದು
ಕುಸುಮ ಗುಚ್ಚಗಳ ಅಂದದ ಸಂಭ್ರಮವಿದು
ಸಾಲು ಹಣತೆಗಳ ಮನೋಜ್ಞ ನೋಟವಿದು
ರಂಗುರಂಗಿನ ಉಡುಗೆ ತೊಡುಗೆಗಳ
ರಸಪಾಕ ಹೋಳಿಗೆ ಕಡುಬುಗಳ
ಸವಿಸವಿದು ನಲಿನಲಿವ ಕ್ಷಣಗಳ
ಮರೆಯಲಾದೀತೆ ಈ ದೀಪಾವಳಿ ದಿನಗಳ
ನರಕ ಚತುರ್ದಶಿ ಬಲಿಪಾಡ್ಯಮಿ
ಅಮವಾಸೆ ವಿಶೇಷಗಳ ಈ ಭೂಮಿ
ಸದಾಕಾಲ ಪರಮಪಾವನವೆನ್ನಿ
ನಿಷ್ಕಲ್ಮಶ ಭಾವದಿ ಆನಂದಿಸುವ ಬನ್ನಿ
ಸಿಂಗಾರಗೊಂಡ ಅಂಗಡಿಮುಂಗ್ಗಟ್ಟು
ಮಿನುಮಿನುಗುವ ಲೈಟುಗಳ ಕಟ್ಟು
ಅಲಂಕಾರಗೊಂಡ ಗುಡಿಗೋಪುರ
ಕಣ್ಕುಕ್ಕಿದೆ ಹೆಂಗೆಳೆಯರ ರೇಶಿಮೆ ಬಂಗಾರ
ಪಟಾಕಿ ಸಿಡಿಸಲೇ ಬೇಕಾ ಮಗುವೇ?
ಯೋಚಿಸೊಮ್ಮೆ ಮಲಿನತೆಯ ಕುರಿತು ಮನವೇ?
ಮಬ್ಬಡರಿಸುವ ಮದ್ದುಗಳ ಆರ್ಭಟವೇಕೆ?
ಪ್ರಜ್ವಲಿಸಲಿ ದೀವಿಗೆಗಳ ಹೊಂಬೆಳಕಿನ ಕೇಕೆ !
ಡಾ.ಎಸ್ ಎಚ್ ಶಫಿಉಲ್ಲ (ಕುಟೀಶ)
ಸಾಹಿತಿಗಳು, ಉಪನ್ಯಾಸಕರು, ಹಿರೇಕುಂಬಳಗುಂಟೆ
ಮೊ.ನಂ: 8867435662
