ಕೇಂದ್ರ ಸರ್ಕಾರದಿಂದ ಇಪಿಎಫ್ ಠೇವಣಿಗೆ ಶೇ. 8.25 ರಷ್ಟು ಬಡ್ಡಿ ಮಂಜೂರಾತಿಗೆ ಅನುಮೋದನೆ!

ದೆಹಲಿ.ಜೂನ್.18: ಕೇಂದ್ರ ಸರ್ಕಾರವು ನೌಕರರ ಭವಿಷ್ಯ ನಿಧಿ (EPF) ಠೇವಣಿಗಳ ಮೇಲಿನ ಬಡ್ಡಿ ದರವನ್ನು ಪ್ರಸಕ್ತ ಹಣಕಾಸು ವರ್ಷಕ್ಕೆ (2025-26) ಶೇ. 8.25 ರಷ್ಟು ಕಾಯ್ದುಕೊಳ್ಳಲು ಅಧಿಕೃತ ಅನುಮೋದನೆ ನೀಡಿದೆ. ಸರ್ಕಾರದ ಈ ನಿರ್ಧಾರದಿಂದಾಗಿ ನೌಕರರ ಭವಿಷ್ಯ ನಿಧಿ ಸಂಸ್ಥೆಯ (EPFO) 7 ಕೋಟಿಗೂ ಅಧಿಕ ಚಂದಾದಾರರಿಗೆ ನೇರ ಲಾಭ ಸಿಗಲಿದ್ದು, ಅವರ ನಿವೃತ್ತಿ ಉಳಿತಾಯಕ್ಕೆ ಮತ್ತಷ್ಟು ಬಲ ಬಂದಂತಾಗಿದೆ.

ವರದಿಗಳ ಪ್ರಕಾರ, ಇಪಿಎಫ್ ಒದ ಅತ್ಯುನ್ನತ ನಿರ್ಧಾರ ಕೈಗೊಳ್ಳುವ ಸಂಸ್ಥೆಯಾದ ‘ಸೆಂಟ್ರಲ್ ಬೋರ್ಡ್ ಆಫ್ ಟ್ರಸ್ಟೀಸ್’ (CBT) ಪ್ರಸ್ತಾಪಿಸಿದ್ದ ಶೇ. 8.25 ರಷ್ಟು ಬಡ್ಡಿ ದರಕ್ಕೆ ಹಣಕಾಸು ಸಚಿವಾಲಯವು ಹಸಿರು ನಿಶಾನೆ ತೋರಿದೆ. ಇದರ ಬೆನ್ನಲ್ಲೇ ಇಪಿಎಫ್ ಖಾತೆಗಳಿಗೆ ಬಡ್ಡಿ ಜಮೆ ಮಾಡುವ ಪ್ರಕ್ರಿಯೆ ಆರಂಭವಾಗಲಿದ್ದು, ಪ್ರಸಕ್ತ ತಿಂಗಳ ಅಂತ್ಯದ ವೇಳೆಗೆ ಸದಸ್ಯರ ಖಾತೆಗಳಿಗೆ ಹಣ ಜಮೆಯಾಗುವ ಸಾಧ್ಯತೆಯಿದೆ.

ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವ ಮನ್ಸುಖ್ ಮಾಂಡವೀಯ ಅವರ ಅಧ್ಯಕ್ಷತೆಯಲ್ಲಿ ಮಾರ್ಚ್ 2, 2026 ರಂದು ನಡೆದ ಸಿಬಿಟಿ ಸಭೆಯಲ್ಲಿ, ಹಣಕಾಸು ವರ್ಷ 2025-26 ಕ್ಕೆ ಇಪಿಎಫ್ ಮೇಲಿನ ಬಡ್ಡಿ ದರವನ್ನು ಶೇ. 8.25 ರಷ್ಟೇ ಉಳಿಸಿಕೊಳ್ಳಲು ನಿರ್ಧರಿಸಲಾಗಿತ್ತು. ಇಪಿಎಫ್ಒ ಸತತ ಮೂರನೇ ವರ್ಷವೂ ತನ್ನ ಸದಸ್ಯರ ಬಡ್ಡಿ ದರದಲ್ಲಿ ಯಾವುದೇ ಬದಲಾವಣೆ ಮಾಡದೆ ಯಥಾಸ್ಥಿತಿ ಕಾಯ್ದುಕೊಂಡಿದೆ.

ಇಪಿಎಫ್ ಠೇವಣಿಗಳಿಗೆ ಸರ್ಕಾರದ ಗ್ಯಾರಂಟಿ ಇರುವುದರಿಂದ, ಸಿಬಿಟಿ ನಿರ್ಧಾರದ ನಂತರ ಈ ಪ್ರಸ್ತಾವನೆಯನ್ನು ಅಂತಿಮ ಮಂಜೂರಾತಿಗಾಗಿ ಹಣಕಾಸು ಸಚಿವಾಲಯಕ್ಕೆ ಕಳುಹಿಸಲಾಗಿತ್ತು. ಈಗ ಸಚಿವಾಲಯದ ಅನುಮೋದನೆ ಸಿಕ್ಕಿರುವುದರಿಂದ ಬಡ್ಡಿ ಹಣ ವಿತರಿಸಲು ಅಧಿಕೃತ ಹಾದಿ ಸುಗಮವಾಗಿದೆ.

ಬಡ್ಡಿ ದರದ ಮಂಜೂರಾತಿಯ ಜೊತೆಗೆ, ಇಪಿಎಫ್ಒ ತನ್ನ ಸೇವೆಗಳನ್ನು ಹೆಚ್ಚು ಸರಳ, ವೇಗ ಮತ್ತು ಪಾರದರ್ಶಕಗೊಳಿಸಲು ‘ಇಪಿಎಫ್ಒ 3.0’  ಎಂಬ ಡಿಜಿಟಲ್ ಸುಧಾರಣಾ ವೇದಿಕೆಯನ್ನು ಜಾರಿಗೆ ತರಲು ಸಜ್ಜಾಗಿದೆ.

ವಿಶೇಷ ಸೌಲಭ್ಯ: ಇನ್ಮುಂದೆ ಇಪಿಎಫ್ ಸದಸ್ಯರು ಯುಪಿಐ  ಆ್ಯಪ್ ಗಳು ಮತ್ತು ಇಪಿಎಫ್ ಸಂಯೋಜಿತ ಎಟಿಎಂ  ನೆಟ್ ವರ್ಕ್ ಮೂಲಕ ತಮ್ಮ ಪಿಎಫ್ ಖಾತೆಯಿಂದ ನೇರವಾಗಿ ಹಣವನ್ನು ಹಿಂಪಡೆಯಬಹುದು.

ರಾಷ್ಟ್ರೀಯ ಪಾವತಿ ನಿಗಮ (NPCI) ಸಹಯೋಗದೊಂದಿಗೆ ಅಭಿವೃದ್ಧಿಪಡಿಸಲಾಗುತ್ತಿರುವ ಈ ಹೊಸ ತಂತ್ರಜ್ಞಾನದ ಪ್ರಾಯೋಗಿಕ ಪರೀಕ್ಷೆ  ಈಗಾಗಲೇ ಯಶಸ್ವಿಯಾಗಿ ಪೂರ್ಣಗೊಂಡಿದ್ದು, ಶೀಘ್ರದಲ್ಲೇ ಅಧಿಕೃತ ಘೋಷಣೆ ಹೊರಬೀಳಲಿದೆ.