ಅಪ್ಪನೆಂಬ ಆಲದ ಮರ : ಸುಜಾತ ಪ್ರಾಣೇಶ್ ಅವರ ಕವನ

ಅಪ್ಪ ನೀನು ಆಲದ ಮರದಂತೆ
ನಿನ್ನ ಮನಸು ವಿಶಾಲವಾದ ಗಗನದಂತೆ
ತೋರುವೆ ಮಕ್ಕಳಲ್ಲಿ ನಿನ್ನ ಪ್ರೀತಿ ಮಮತೆ

ನಿನ್ನ ಸುಖವ ಮರೆಯುವೆ ಮಕ್ಕಳಿಗಾಗಿ
ನೀನಾಗಿಬಿಡುವೆ ನಿಜವಾದ ತ್ಯಾಗಿ
ದುಡಿದು ದಣಿಯುವೆ ಮನೆಗಾಗಿ

ಕೇಳಿದ್ದನ್ನು ಕೊಡಿಸುವ ಕಲ್ಪವೃಕ್ಷ ನೀನು
ತಿದ್ದಿ ಬುದ್ಧಿ ಹೇಳುವ ಗುರುವು ನೀನು
ವಾತ್ಸಲ್ಯ ಧಾರೆ ಹರಿಸಿಬಿಡುವೆ ನೀನು

ದಾರಿದೀಪವಾಗಿ ಮುನ್ನಡೆಸುವೆ ನೀನು
ಕಂದ ನೀನೆ ಕಣ್ಣಬೆಳಕು ಎನ್ನುವೆ ನೀನು
ಕೂಸುಮರಿ ಮಾಡುತ ಆಡಿಸುವೆ ನೀನು

ನನ್ನ ನೋಡಿ ಕಷ್ಟಗಳ ಮರೆಯುವೆ ನೀನು
ನಾನೆ ನಿನ್ನ ಜಗವೆಂದು ಹೇಳುವೆ ನೀನು
ನನಗೆ ನೋವಾದರೆ ಸಹಿಸಲಾರೆ ನೀನು

ಉತ್ತಮ ಸಂಸ್ಕಾರ ನೀಡಿ ಬೆಳೆಸುವೆ ನೀನು
ಸಮಾಜವ ಎದುರಿಸಲು ಧೈರ್ಯ ಕೊಡುವೆ ನೀನು
ನಿಸ್ವಾರ್ಥಿಯಾಗಿ ಬಾಳಲು ಕಲಿಸುವೆ ನೀನು

ನಿನ್ನ ಹೆಸರೇ ನನ್ನ ನಿಜವಾದ ಗುರುತು
ನನ್ನ ಜೀವನವೇ ಇದಕ್ಕೆ ಋಜುವಾತು
ನೀನೇ ನನ್ನ ಬಾಳಿನ ಜೀವತಂತು

ನನ್ನ ಯಶಸ್ಸು ನಿನಗೆ ಆನಂದ ನೀಡುವುದು
ಇಂದಿಗೆ ಬಾಳು ಸಾರ್ಥಕ ಎನಿಸುವುದು
ಧನ್ಯತೆಯ ಭಾವದಿಂದ ನಿನ್ನ ಮನ ತುಂಬುವುದು

ನಿನ್ನ ಜೀವನ ಸಂಧ್ಯೆಯಲಿ ಊರುಗೋಲಾಗುವೆ
ನನ್ನ ಮಗುವಿನಂತೆ ನಿನ್ನ ಜೋಪಾನ ಮಾಡುವೆ
ನಿನಗಾಗಿ ನನ್ನ ಜೀವನ ಮುಡಿಪಾಗಿಡುವೆ .

ಸುಜಾತ ಪ್ರಾಣೇಶ್
ಚಿತ್ರದುರ್ಗ, ಮೊ : 9986153163